गीता कुँवर, अछाम

चौरपाटी गाउँपालिका २ सिउडीकी पार्बती थापाको एसईई परिक्षा केन्द्र साँफेबगर नगरपालिका १ बैद्यनाथको सुर्यचन्द्र माबीमा पर्याे । घरबाट दैनिक परिक्षा दिन सम्भव नभएकाले उनीले चैत ३ गते नै परिक्षा केन्द्र नजिकै कोठा लिएर परिक्षा दिने तयारीमा थिईन् । परिक्षाको अघिल्लो दिन साझ कोरोनाको कारण एसईई परिक्षा स्थगित भएको खबर आयो । उनले त्यो खबर पत्याईनन् । उनी पछिल्लो दिन बिहानै परिक्षा दिन परिक्षा केन्द्रका पुगिन् ।

उनले भनिन् ‘परिक्षा स्थगित भएको बिश्वाश नै लागेन,परिक्षा केन्द्रमा पुगेपछि सरले परिक्षा नहुने भनेपछि मात्र बिश्वाश लाग्यो । ऋण निकालेर परिक्षा दिन आएको थिए । पैसा खर्च भयो । घर फर्किदा निकै दुख लागेको छ ।’

सिउडीकै आशिष शाह पनी परिक्षा स्थगित भएपछि निन्याउरो अनुहार लगाएर घर फर्किदै थिए । उनी अन्यौलमा थिए । कोहि साथीहरु भोली देखि सुरु हुन्छ परिक्षा भन्दै थिए । उनले भने ‘एक त परिक्षा केन्द्र टाढा पर्छ,त्यसमाथी यसरी परिक्षा स्थगित हुदाँ झनै समस्या भयो,अब परिक्षा कहिले हुने हो थाहै छैन ।’ घरबाट दिएको पैसा त्यसै खर्च भयो, नहुनेलाई त झनै मर्का परेको छ ।

यसको क्षतिपुर्ति गाउँपालिकाले दिनुपर्छ ।’ कोरोनाको बारेमा सबैलाई थाहा थियो परिक्षा स्थगित गर्दा एक हप्ता अगाडी नै गरेको भए यस्तो मर्का नपर्ने उनी बताउँछन् । सुर्यचन्द्र माबीका प्रधानाध्यापक केन्द्राध्यक्ष देबेन्द्रबहादुर शाहले अन्तिम समयमा आएर परिक्षा रोकिदा टाढाका विद्यार्थीहरु निकै मर्कामा परेको बताए ।

उनले भने सरकारले यो निर्णय छिटो गर्नुपर्ने थियो,परिक्षा रोकिएको खबर आयो तर पनी हिजो राती ९ बजेसम्म सिट प्लानिङ्ग नै गरिरहेका थियौ । बिहान मात्र आएर विद्यार्थी घर फर्किन भन्यौ ।’ दुर्गमका परिक्षार्थीहरु ऋण निकालेर आएका थिए उनीहरु बढी मर्कामा परे उनले भने ।

फोटो क्याप्सन : पहिलो पटक परीक्षा केन्द्र तोकिएको मालिका मावी बारलाको परिक्षा केन्द्र बाट आफ्नो घर फर्किदै गरेका बिध्यार्थी । तस्वीर वेदप्रकाश तिमिल्सेना