होम साउद, अछाम /

मंगलसेन नगरपालिकाले कोरोना भाईरसको सम्भावित जोखिमलाई मध्यनजर गर्दै मंगलसेन जीपपार्कमा हेल्थ डेस्क स्थापना गरेको छ । आईतबार बसेको कोरोना भाईरस प्रतिरोध आकस्मिक सर्वपक्षीय बैठकको निर्णय कार्यान्वयन गर्दै हेल्थ डेस्क स्थापना गरि सञ्चालनमा ल्याईएको हो ।

हेल्थ डेस्कमा स्वास्थ्यकर्मीहरुले ईन्फ्रारेड फरहेड थर्मोमिटर मार्फत यात्रुहरुको ज्वरो चेकजाँच, कोरोना सम्वन्धि स्वास्थ्य परामर्श र जनचेतनामुलक पर्चा बितरण कार्य भैरहेको छ ।

हेल्थ डेस्क स्थापना पछि नगर प्रमुख पदमबहादुर बोहराले विश्वब्यापी महाँमारिको रुपमा फैलिएको कोरोना भाईरसको सम्भावित जोखिम न्यूनिकरणका लागि नगरपालिकाले सचेतना अपनाएको बताउनुभयो ।

नागरिकको स्वास्थ्यप्रतिको दायित्व पुरा गर्न यस्तो रणनीति अपनाएको बोहराको भनाई छ । भाईरस संक्रमणको सम्भावित जोखिम न्यूनिकरण गर्न नगरपालिकाले आकस्मिक कोष स्थापना, स्वास्थ्यकर्मी–कर्मचारी परिचालन, एम्वुलेन्स परिचालनका लागि नगरपालिका तयार रहेको नगरप्रमुख बोहराले बताउनुभयो ।

हेल्थ डेस्क मार्फत सोमबार बिहान ६ देखी ९ बजेसम्म मंगलसेन भीत्रीएका ६ वटा बसमा महिला, पुरुष र बालवालिका गरि २०० बढीको प्रारम्भिक स्वास्थ्य परिक्षण गरिएको नगरपालिकाका सूचना अधिकारी तथा योजना अधिकृत खकेन्द्र बहादुर सोडारीले जानकारी दिनुभयो ।

नगरपालिकाबाट प्रवाह हुने आकस्मिक बाहेकका सबै सेवा अर्को सूचना नभएसम्मका लागि स्थगित गरेर सिंगो नगरपालिकाको टिम कोरोना भाईरसको सम्भावित जोखिम न्यूनिकरणमा लागिरहेको सूचना अधिकारी सोडारीको भनाई छ ।

हेल्थ डेस्क स्थापना तथा सेवा सुभारम्भका लागि नगरप्रमुख पदमबहादुर बोहरा, प्रमुख प्रशासकिय अधिकृत ओमकार शाह, स्वास्थ्य संयोजक मानबहादुर सोडारी सहितको टोलिले स्थलगत रुपमा खटेर परामर्श दिएको उहाँले जानकारी दिनुभयो ।

नगरपालिकाले स्थापना गरेको हेल्थ डेस्कमा सिनियर अहेब चन्द्रप्रसाद ढुंगाना, सिनियर अनमी ज्ञानु माझि, स्वास्थ्यकर्मी प्रवेश भण्डारी, श्रृजना कठायत र रत्ना सोडारी (रावल) लगायतको टोलि खटिएको छ ।

स्वास्थ्यकर्मीको टोलिलाई पालैपालो २४ सै घण्टा सेवा दिनेगरि खटाईएको नगरपालिकाका स्वास्थ्य संयोजक मान बहादुर सोडारीले बताउनुभयो ।

 बिदेश र सहरी क्षेत्रबाट आउने ब्याक्तिहरुले कम्तिमा २ हप्ता सेल्फ क्वारेन्टाईनमा बस्न, सावुन पानीले बेला बेलामा हात धुन, मास्कको प्रयोग गर्न, खोक्दा हाछ्यु गर्दा कुहिनो वा रुमालले छोप्न आग्रह गर्नुभयो ।

यस्तै भिडभाडमा नजान, ज्वरो, रुघाखोकी र स्वासप्रश्वासमा समस्या जस्ता लक्षण देखीएमा तुरन्त स्वास्थ्य संस्थामा जान स्वास्थ्य संयोजक सोडारीले अनुरोध गर्नुभयो ।