जनकपुरधाम– महोत्तरीको बर्दिवासका प्रशान्त कुश्वाहा त्रिभुवन विश्वविद्यालय कीर्तिपुरमा वाणिज्य संकायमा स्नातकोत्तर गरिरहेका छन् । प्रशान्त कीर्तिपुरमा कोठा बहालमा लिएर अध्ययन गरिरहेका छन् ।

प्रशान्तजस्तै उच्च शिक्षा अध्ययन गर्न प्रदेश २ को विभिन्न जिल्लाबाट त्यहाँ पुगेका विद्यार्थीहरु बहालमा बसिरहेका छन् । केही दिनअघिसम्म सबै कुरा सामान्य रहेको उनीहरुलाई अहिले ‘लकडाउन’ ले पिरोलेको छ ।

चाँडै ‘लकडाउन’ सकिने र जनजीवन सामान्य हुने उनीहरुलाई लागेको थियो । तर, ठीक विपरित भएको छ । प्रशान्त र उनका साथीहरु आ–आफ्नो घर फर्किने प्रयास पनि नगरेका होइनन् । गाडी चलिरहेको बेला टिकट पाइएन, पछि गाडी पूर्णरुपले बन्द भएपछि कीर्तिपुरमै फसे छन् उनीहरु ।

कोरोना संक्रमण रोक्न ‘लकडाउन’ लम्बिँदै जाँदा प्रशान्त र उनका साथीहरु अहिले समस्यामा परेका छन् । कोठामा भएको चामल, दाललगायतका सबै खाद्यान्न सकिसकेको छ, प्रशान्त र उनीसँगै बस्ने अन्य विद्यार्थीहरुको ।

कमसेकम दुई छाकको जोहो गर्न उनीहरुले हरसम्भव प्रयास गरे । नगरपालिकाले राहत वितरण गरिरहेको सुनेपछि उनीहरु त्यहाँ पनि पुगे । तर, राहत पाएनन् । स्थायीवासीले मात्र राहत पाउने व्यवस्था अड्चन बन्यो उनीहरुलाई । वडाध्यक्षदेखि नगरपालिकाका अधिकांश कर्मचारीहरुलाई आग्रह गरेका थिए उनीहरुले ।

सरकारी राहत पाउन घरबेटीको स्वीकृति चाहिँदो रहेछ । घरबेटीको सिफारिस पाउने केही विद्यार्थीलाई नगरपालिकाको राहत प्राप्त भयो । तर, अधिकांशले पाएका छैनन् ।

सबै बाटो बन्दभएपछि प्रशान्तका साथै सबै विद्यार्थीहरुले काठमाडौं बस्ने आ–आफ्ना जिल्लाका नेताहरुलाई फोन लगाउन सुरु गरे । प्रशान्तले नेपाली कांग्रेसका उपसभापति विमलेन्द्र निधिलाई बुधबार बिहान फोन गरेर आफूहरुले भोगिरहेको समस्या सुनाए ।

उनले राहतको लागि नगरपालिकासँग आग्रह गरिरहे पनि सुनवाइ नभएको भनेपछि उपसभापति निधिले समस्यामा परेका ४५ जना विद्यार्थीहरुका लागि खाद्यान्न पठाइदिएका छन् ।

‘सबै साथीहरुले आफ्नो जिल्लाका नेताहरुलाई फोन गर्ने क्रममा मैले निधि सरलाई आज फोन गरेर समस्या सुनाएको थिएँ,’ प्रशान्तले भने, ‘उहाँले ४५ जना विद्यार्थीहरुका लागि खाद्यान्न पठाइदिनु भएको छ ।’

चामल, आलु, खाने तेल, सोयाबिन, साबुनलगायतका खाद्यान्न सामग्री आफूहरुले सहयोग पाएको प्रशान्तले सुनाए । ‘यस्तो कठिन समयमा उहाँबाट भएको सहयोगले हामीलाई धेरै राहत पुर्याएको छ,’ प्रशान्तले भने । उहाँले आफ्नो स्वकीय सचिव विश्वास विक्रममार्फत् सबै सामान पठाइदिएको प्रशान्तले बताए ।

उपसभापति निधिले आफूहरु समस्यामा रहेको भन्दै विद्यार्थीहरुले जानकारी गराएको बताए । ‘उहाँहरु समस्यामा हुनुहुन्छ, खाना सबै भन्दा ठूलो समस्याको रुपमा देखिएको छ,’ निधिले भने, ‘उहाँहरु जस्तै अरु पनि होलान् । सरकारले सबैको खोजी गरेर उचित व्यवस्था गर्नतर्फ ध्यान दिनुपर्यो ।’

मधेशी आयोगदेखि जिल्लाका प्रतिनिधिसभा सदस्यहरुलाई फोन गरेर सहयोगको लागि आग्रह गरेपनि कसैले सहयोग नगरेको उनले बताए । ‘मधेशी आयोगमा फोन गर्यौं, साथीहरुले आ–आफ्ना जिल्लाबाट प्रतिनिधिसभा सदस्यहरुलाई फोन गरे,’ उनी भन्छन्, ‘तर खासै वास्ता भएन ।’

‘लकडाउन’ अरु कति िदन रहने ठेगान नरहेको भन्दै उनले भने, ‘कि त सरकारले हामीलाई घरसम्म पुर्याइदिने व्यवस्था गरिदिनु पर्यो कि त बस्ने खाने ।’ प्रशान्तका अनुसार कीर्तिपुरमा बहालमा बस्दै आइरहेका प्रदेश २ को आठ जिल्लाका करिब ४० देखि ५० विद्यार्थीहरु समस्यामा छन् । – nepalsamaya