अस्पतालमा उपचाररत ३८ जनाको स्वास्थ्य सामान्य

काठमाडौं । गत २४ घण्टामा कोरोना भाइरसको आशंकामा  एक हजार १९३ को  नमुना संकलन गरे परीक्षण गरिएको स्वास्थ्य तथा जनसंख्या मन्त्रालयले  जनाएको छ । 

मन्त्रालयले मंगलबार गरेको प्रेस ब्रिफिङ्‌मा मन्त्रालयका प्रवक्ता डा. विकास देवकोटाले हालसम्म कोरोना भाइरसको आशंकामा  ५४ हजार  ८१६ जनाको नमुना संकलन गरेर परीक्षण  गरिएको जानकारी दिए । उनले पीसीआर विधिबाट हालसम्म १० हजार ८०७ जना र आरडीटी विधिबाट ४३ हजार ४३ जनाको कोरोना भाइरसको आंशकामा नमुना परिक्षण गरिएको जानकारी दिए ।  

“आज देशैभरका आइसोलेसनमा एक सय ७ जना रहेका छन् । जसमा काठमाडौं उपत्यकमा ४ जना र उपत्यकाबाहिरका अस्पतालमा एक सय ३ जना रहेका छन्,” उनले भने, “आज देशैभरका क्वारेन्टाइनमा २२ हजार  ९९ जना रहेका छन् ।”

आज रौतहट जिल्लाका २४ वर्ष र ३५ वर्ष पुरुषहरुको स्वाब राष्ट्रिय जनस्वास्थ्य प्रयोगशालामा गरिएको परिक्षणमा  कोरोना संक्रमण देखिएको छ । उनीहरु भारतबाट नेपाल आएका र क्वारेन्टाईनमा बसेका थिए ।  हालसम्म संक्रमितको संख्या ५४ पुगेको छ जसमा १६ जना निको भएका मन्त्रालयका प्रवक्ता डा.देवकोटाले जानकारी दिए । 

मन्त्रालयका अनुसार म्अस्पतालमा ३८ जना उपचाररत रहेका छन् । हाल प्रदेश १ को कोशी अस्पताल विराटनगरमा ३१ जना र नारायणी अस्पतालमा ५ जना, चितवनमा १ र सेती अस्पतालमा १ जना संक्रमितको उपचार भइरहेको छ । सबैको स्वास्थ्य अवस्था सामान्य रहेको छ ।

मन्त्रालयको हाम्रो स्वास्थ्य मोबाइल एपमामा गत २४ घण्टामा ५ जना रेड जोनमा परेका छन् भने हालसम्म रेड जोनमा पर्नेको तीन सय ९ जना परेका मन्त्रालयले जनाएको छ । 
त्यसैगरी, स्वास्थ्य सेवा विभागलाई शिखर ईन्सुरेन्स कम्पनी प्रा.लिले १७ हजार सर्जिकल मास्क  सहयोग गरेको  मन्त्रालयले जनाएको छ । – baarahkhari