सुर्खेत– कोरोना भाइरसको त्रासका कारण देशका अधिकांश आयोजनाहरुको काम ठप्प छ । लामो समयसम्म लकडाउन नखुलेपछि मजदुरहरु गाउँ पुगेका छन् ।

तर, निर्माणाधिन राष्ट्रिय गौरवको भेरी–बबई बहुउद्देश्यीय आयोजनालाई भने लकडाउनले खासै असर परेको छैन । सामाजिक दुरी कायम राख्दै ८० जना मजदुरले काम गरिरहेको आयोजनाले जनाएको छ ।

आयोजनाका इन्जिनियर शम्भुराज पण्डितले भने, ‘लकडाउनअघि नै हामीले महिनादिन पुग्ने सामग्री राखेका थियौँ । महिना दिनसम्म त्यहीले काम चलायौं । नजिक घर हुने केही मजदुरहरु गाउँ गए पनि ८० जना जनाले दैनिक काम गरिरहनु भएको छ ।’

हाल भेरी नदीको चिप्लेमा निर्माणाधिन व्यारेजको काम भइरहेको छ । स्थानीय प्रशासनले जिल्लाभित्र उपलब्ध हुने स्रोत साधनको प्रयोग गरेर काम गर्न अनुमति दिएको छ । सुरुङ बाहिरको स्लोप निर्माणको काम पनि भइरहेको छ । दोस्रो चरण अन्तर्गत बाँध तथा पावरहाउस निर्माणका लागि ६ अर्ब १६ करोडमा ठेक्का सम्झौता गरिएको छ ।

चिप्लेस्थित भेरीबाट बबई नदीसम्म १२ किलोमिटर लामो सुरुङमार्फत् भेरीको पानी बबईमा खसाल्ने योजना छ । यसबाट ४६ मेगावाटको जलविद्युत निकाल्ने र उक्त पानीले बाँके र बर्दियाको ५१ हजार हेक्टर जमिन सिँचाइ गर्ने आयोजनाको लक्ष्य छ ।

सामाजिक दुरी कायम राखेर मजदुरले काम गरिरहेको आयोजनाले जनाएको छ । मजदुरलाई आयोजना स्थलमै खाने–बस्ने सुविधा मिलाइएको छ ।

४० प्रतिशत काम सकियो

राष्ट्रिय गौरवको भेरी–बबई बहुउद्देश्यीय आयोजनाको झण्डै ४० प्रतिशत काम सकिएको छ । ‘समग्रमा ४० प्रतिशत काम सकिएको छ,’ पण्डितले भने, ‘पहिलो र दोस्रो चरणको काम उत्साहजनक रुपमा हुँदा तोकिएकै समयमा आयोजना सम्पन्न हुने आशा गरेका छौँ ।’ आयोजाको पहिलो चरण अन्तर्गत गत वर्ष नै सुरुङमार्ग ‘ब्रेकथ्रु’ भएको थियो ।

अघिल्लो वर्ष वैशाख ३ गते प्रधानमन्त्री केपी शर्मा ओलीले ब्रेकथ्रु गरेका थिए । पहिलो चरणको सुरुङ्ग निर्माण गर्ने काम निर्धारित समयभन्दा एक वर्षअघि नै सकेर चर्चा कमाएको थियो ।

नेपालमै पहिलोपटक टनेल बोरिङ मेसन (टिबिएम) मार्फत १२ किलोमिटर सुरुङ छिचोलिएको आयोजनाको दोस्रो चरण अन्तर्गत बाँध निर्माण र विद्युत् गृह निर्माणका लागि गत मंसिर १६ गते शिलान्यास गरेर काम सुरु भएको छ । आयोजनाको दोस्रो चरण अन्तर्गत बाँध र पावर हाउस (विद्युत् गृह) निर्माणको काम रमण–ग्वाङडोन जेभीले लिएको छ ।

निर्माण कम्पनीले सम्झौता भएलगत्तै दोस्रो चरणको काम अन्तर्गत क्याम्प निर्माण, क्रसर प्लान्ट, ब्याचिङ प्लान्टको काम र सुरुङ फिनिसिङ अन्तिम चरणमा पुगेको इन्जिनियर पण्डितले बताए । दोस्रो चरणको क्याम्प निर्माण, क्रसर प्लान्ट, ब्याचिङ प्लान्ट र सुरुङ फिनिसिङको काम अन्तिम चरणमा छ ।

आयोजना अन्तर्गत भेरी नदीको चिप्लेमा एक सय १४ मिटर लामो, ६ ब्यारेजसहितको १५ मिटर अग्लो बाँध निर्माण हुनेछ । ३३ अर्ब १९ करोडमा २०८० सालभित्र निर्माण सम्पन्न हुनेगरी आयोजनाको काम भइरहेको छ । – nepalsamaya