कल्पना बाेहरा, अछाम

अछाममा र्यापिड डाइग्नोस्टिक टेस्ट (आरडिटी) किटको अभाव भएको छ । १० वटै स्थानीय तहमा भारतबाट फर्केका नागरिकको आरडिटी गर्ने निर्णय भएको भए पनि किटको अभावमा सो कार्य अघि बढाउन सकिएको छैन । जिल्लाका १० वटा स्थानीय तहमध्ये नौ वटा स्थानीय तहका एक÷दुई वडामा मात्रै आरडिटी टेस्ट गरिएको छ । चौरपाटी गाउँपालिकामा भने किटको अभावमा परिक्षण हुन सकेको छैन ।

जिल्लामा हाल ९५ किट मात्रै मौज्दात रहेको जिल्ला स्वास्थ्य कार्यालयका सूचना अधिकारी देव जोशीले रेडियो जनप्रियलाई जानकारी दिनुभयो । उहाँले जिल्लामा अहिले १ सय ६३ जना क्वारेन्टाईमा रहेको छन । अन्य व्यक्ति भन्दा पनि क्वारेन्टाईना राखेका व्यक्तिको आरडिटी चेकजाँचमा समेत किटको अभाव भएको छ । जिल्लामा चैत महिनामा झण्डै चार हजार नागरिक भारतबाट फर्केका भए पनि ८ सय ३ को आरडिटी गरिएको छ ।

यस्तै २ सय ५ को स्वाब परीक्षण गरिएको सूचना अधिकारीको भनाई रहेको छ । अहिलेसम्म परीक्षण गरिएका सबैको रिपोर्ट नेगेटिभ आएको छ। तीन जनाको स्वाँव परिक्षणको रिर्पोट आउन वाँकी रहेको छ । जिल्लामा आरडिटी किटको अभाव भएकाले प्रदेशमा माग गरिएको भए पनि प्रदेशमा समेत आरडिटी किटको अभाव हुँदा आउनमा ढिलाई भएको जिल्ला स्वास्थ्य कार्यालय अछामका प्रमुख झनकप्रसाद ढुंगानाले जानकारी दिनुभया । उहाँले एक हप्ता अघि दुई हजार किटको लागि प्रदेश सरकारसँग माग गरिएको जानकारी दिनुभयो ।

स्वास्थ्य निर्देशनालय दिपायले एक हप्ता भित्रै किट पठाउने जानकारी गराएको उहाँको भनाई रहेको छ । अदालतमा आउने कैदीवन्दिको आरडिटि चेकजाँच गर्नु पर्ने हुँदा पनि किटको अभाव देखिएको छ । कोरोना भाइरस रोकथाम तथा नियन्त्रण योजनाअन्तर्गत जिल्ला संयन्त्रको बैठकले भारतबाट फर्केका नागरिकको आरडिटी गर्ने निर्णय गरेको थियो तर किटको अभावमा सो निर्णय कार्यान्वयनमा समस्या भएकोे छ ।