दिनेश केसी, अछाम ।

पञ्चदेवल विनायक नगरपालिकाको क्वारेण्टाईनमा बसेका २ जनालाई घर पठाईएको छ । कोरोना संक्रमण रोकथाम तथा न्युनिकरणका लागी नगरपालिकाले स्थापना गरेको क्वारेण्टाईनमा १४ दिन पुरा गरेका प्रकास बिक र कमल रावलकोे बिदाई गरिएको हो ।

जिल्ला प्रशासनले २१ दिन अनिवार्य क्वारेण्टाईनमा बस्न परिपत्र गरे पनि नगरपालिकाले उनिहरुको स्वास्थ्यको लागी बाँकी ७ दिन होम क्वारेण्टाईन अर्थात घरको एकान्त बास नै सुरक्षित हुने भएकाले बिदाई गरिएको नगरपालिकाले जानकारी दिएको छ । वडा नम्वर ४ कालिकास्थानका प्रकास बिक लकडाउनको अवधीमा नेपाल सरकारले जारी गरेको निर्देशन कार्यान्वयन गर्नु पर्छ भनि स्वस्फुर्त ढंगबाट बैशाख १२ गते क्वारेण्टाईनमा बसेका थिए ।

यस्तै वडा नम्वर ७ पुल्लेतोलाका कमल रावल बैशाख १३ गते कपिलबस्तुबाट पञ्चदेवलको क्वारेण्टाईनमा आई आफै बसेका थिए । नगरपालिकाले स्थापना गरेको क्वारेण्टाईनमा १४ दिन बिताएका रावलले त्यहाँ रहदाँ खाद्यान्न लगायत स्वास्थ्य सेवामा कुनै कमि नभएको जानकारी दिए । आफै स्वास्थ्यकर्मी भएकाले १४ दिनको क्वारेण्टाईनमा बस्न कुनै असहज नभएको बताए । अव बाँकी ७ दिन आफै सुरक्षित होम क्वारेण्टाईनमा अर्थात घरको एकान्त बासमा बस्ने र बाँकी समुदायलाई पनि सचेत र सतर्कता अपनाउन घरमै बसी सबैलाई आग्रह गर्ने उनले बताए ।

बैशाख १३ गते देखी आज सम्म आफ्नो स्वईच्छाले क्वारेण्टाईनमा बसेका रावललाई नगरपालिकाका निमित्त प्रमुख प्रशासकिय अधिकृत पदम बहादुर माझीले प्रमाण पत्र र बधाइका साथ विदाई गरेका छन् ।

नेपाल सरकारको नियम आफ्नै लागी पालना गरि १४ दिन सम्म क्वारेण्टाईनमा बसि नगरपालिकालाई सहयोग गरेकोमा धन्यवाद समेत दिएका छन् । क्वारेण्टाईनमा बसेका सबैको आरडिटी रिपोर्ट नेगेटिभ देखिएको थियो । बाँकी वडा नम्वर ५ लयाँटीका हरि बुढा र ललित शाहीको कोरोना परिक्षण गरिएको छैन ।

लयाँटीका २ जना २० गते भन्दा पहिले नै नेपालगञ्जबाट अछाम भित्रिएका थिए । क्वारेण्टाईनमा बाहिरबाट प्रबेश गरेकाहरुको संख्या थपिने क्रम बढ्दो अवस्थामा हुँदा उनिहरुलाई थप ७ दिन होम क्वारेण्टाईन मै बस्न निर्देशन सहित बिदाई गरिएको निमित्त प्रमुख प्रशासकिय अधिकृत माझीले जानकारी दिए ।