काठमाडौं । प्रमुख प्रतिपक्षी दल नेपाली कांग्रेसका नेता  शेरबहादुर देउवाले अमेरिकाको मिलेनियम च्यालेन्ज कर्पोरेसन (एमसीसी) पारित गर्न सरकार उदासीन बनेको आरोप लगाएका छन् ।

सरकारको नीति तथा कार्यक्रममाथि आज धारणा राख्दै उनले सरकार संसदबाट एमसीसी पारित गराउन उदासीन बनेको भन्दै यही बजेट अधिवेशनमै सो प्रस्ताव पारित गराउन सरकारलाई चुनौती दिएका छन् ।  

“अघिल्लो सरकारले गरेको हालसम्मकै सबैभन्दा ठूलो सहयोगसम्बन्धी सम्झौता एमसीसीलाई यो सदनबाट पारित गर्नेबारे सरकारको उदासीनता देखिएको छ । नीति तथा कार्यक्रममा यसलाई समावेश गरेरै जिम्मेवारी र जवाफदेहितासाथ सरकार अग्रसर हुन सकेको देखिएन,” उनले भने । उनले एमसीसी यही सदनमा प्रस्तुत गरेर पारित गर्ने प्रक्रिया अघि बढाउन पनि माग गरे ।

पूर्ववर्ती सरकारले गरेका निर्णय र सम्झौता उल्लंघन गर्दै जाने प्रवृत्तिले गलत नजिर स्थापित गर्ने भन्दै उनले सरकारलाई एमसीसी पारित गर्ने प्रक्रिया अघि बढाउन चुनौती पनि दिए । – barahkhari