अछाम । अछामको कमलबजार प्राथमिक केन्द्रमा मेडिकल अधिकृत आईपुगेका छन् । आठौँ तहको चिकित्सकको रुपमा सुदूरपश्चिमको सामाजिक विकास मन्त्रालयले डाक्टर गुञ्जल कुमार शाहलाई खटाएको हो ।

प्राथमिक स्वास्थ्य केन्द्रमा एक बर्ष देखि चिकित्सक नहुँदा स्थानीयलाई समस्या भएको थियो । एमबिबिस चिकित्सक सहितको १० जनाको दरबन्दी भएको प्राथमिक स्वास्थ्य केन्द्रमा डाक्टर थिएनन् ।

सुदूरपश्चिम प्रदेश सभा सांसद अम्बिका कुमारी थापाको विशेष पहलमा डाक्टर अछाम खटाईएको हो । प्रदेश सांसद थापाले स्थानीयहरुको स्वास्थ्य उपचार गर्न बाहिरी जिल्ला जानुपर्ने समस्या रहेको भन्दै चिकित्सक पठाउन प्रदेश सरकारलाई माग गरेको बताइन् ।

चिकित्सक पठाउन सहयोग गरेको भन्दै प्रदेश साँसद अम्बिका थापाले प्रतिनिधि सभाका सांसद रामबहादुर बिष्ट र सुदूरपश्चिम प्रदेशका सामाजिक विकास मन्त्री कृष्णराज सुवेदीलाई धन्यवाद ज्ञापन गरेकी छन् ।

प्राथमिक स्वास्थ्य केन्द्रबाट तुर्माखाद गाउँपालिका, ढकारी गाउँपालिका, पञ्चदेवल विनायक नगरपालिका र कमलबजार नगरपालिका स्थानीयहरुले सेवा लिने गरेका छन् ।

स्वास्थ्य केन्द्रमा चिकित्सक नुहँदा समस्या भएकोमा स्थानीयहरु अहिले खुशी भएका छन् । यसअघि सामान्य उपचारका लागि पनि स्थानीयहरुले टाढाटाढा जानुपर्ने बाध्यता रहेको थियो ।