अछाम ।

अछामको साफेबगर नगरपालिका वडा नम्बर ४ बाट २१ जनाको स्वाब संकलन गरि परिक्षणका लागि पठाईएको छ । साँफेबगरको मष्टामाण्डौँमा कोरोना पोजेटिभ देखिएका यूवकसंगै बसेको अन्य २१ जनाको स्वाब पनि पिसिआर परिक्षणको लागि पठाईएको हो ।

वडा नम्बर ४ को जनकल्याण माबीको क्वारेन्टाईनमा बसेका ति युवकमा शुक्रबार कोरोना भाईरसको संक्रमण भएको पुष्टि भएको थियो ।

संक्रमण फैलिन नदिन र थप सर्तकता अपनाउन कोरोना पुष्टि भएसङ्गै क्वारेन्टाईन बसेकाको स्वाव संकलन गरिएको बताइएको छ ।

यस्तै देवीस्थानमा शनिबार थप २१ जनालाई क्वारेन्टाईनमा राखिएको छ । यो सँगै देवीस्थानको क्वारेन्टाईनमा बस्नेको संख्या १४८ पुगेको छ ।

देवीस्थानमा क्वारेन्टाईनमा बसेका ३४ जनाको आरडिटी परिक्षण गरिएकोमा ६ जनामा पोजेटीभ देखिएको थियो । उनिहरुको शुक्रबार स्वाव संकलन गरि पिसिआर परिक्षणका लागि पठाउने भनिएपनि अछाममा शुक्रबार अबिरल बर्षा हुदाँ स्वाव संकलन गर्न नसकिएको वडा अध्यक्ष गणेश खड्काले जानकारी दिए ।