काठमाडौं – नेपाली कांग्रेसले संविधान संशोधनको प्रस्ताव आज संसदबाट वृहत्तर सहमतिका साथ पारित भएसँगै भूमि फिर्ताको राष्ट्रिय अभियान दोस्रो चरणमा प्रवेश भएको बताएको छ।

कांग्रेस प्रवक्ता विश्वप्रकाश शर्माद्वारा जारी वक्तव्यमा भूमि फिर्ताको दोस्रो चरणको अभियानमा अब गम्भीर कुटनैतिक पहलको अपेक्षा गरिएको उल्लेख छ।

‘लिम्पियाधुरा, लिपुलेक र कालापानीको भू—भाग समावेश गरेर नेपालको संविधानको धारा ९ को उपधारा २ संग सम्बन्धित अनुसूची–३ मा संशोधन गर्न संघीय संसदमा प्रस्तुत संविधान संशोधनको प्रस्ताव आज संसदबाट वृहत्तर सहमतिका साथ पारित हुनु ऐतिहासिक रुपले अत्यन्तै महत्वपूर्ण छ। नेपाली कांग्रेस स्वदेश र बिदेशमा रहेका सबै नेपाली दिदिबहिनी दाजुभाइमा बधाई ज्ञापन गर्दछ।’, वक्तव्यमा उल्लेख छ।

राष्ट्रियताको पक्षमा प्रस्तुत राष्ट्रिय एक्यवद्धता पछि अब लिम्पियाधुरा, लिपुलेक र कालापानीमा नेपालको हक निर्वाध ढंगले स्थापित गर्न सरकारले यो राष्ट्रिय एकतालाई परिपक्व ढंगले उपयोग गर्न जरुरी रहेको कांग्रेसले उल्लेख गरेको छ। नेपाली कांग्रेसले उच्च स्तरीय कुटनैतिक पहल प्रभावकारी र परिणाममुखी ढंगले गर्न सरकारलाई आग्रहसमेत गरेको छ।

‘जब–जब राष्ट्रियताको प्रश्न आउँछ या कुनै पनि राष्ट्रिय महत्वको बिषय आउँछ नेपाली कांग्रेस संयमतापूर्वक सदैव संस्थागत निर्णय एवं सुस्पस्ट विचारका साथ दृढ ढंगले उभिंदै आएको छ र आगामी दिनमा पनि त्यसरी नै उभिने छ।’, वक्तव्यको अन्तिममा उल्लेख छ। – नेपाल समय