काठमाडौं– स्वास्थ्य मन्त्रालयले एक जिल्लाबाट अर्को जिल्लामा जाँदा कोरोना परीक्षणको रिपोर्ट आवश्यक नभएको बताएको छ।

लकडाउन खुकुलो भएपछि एक जिल्लाबाट अर्को जिल्लामा जानेको संख्या बढेसँगै स्थानीय सरकार र घरबेटीले पीसीआर परीक्षणको रिपोर्ट मागेको गुनासोको आधारमा मन्त्रालयले परीक्षण आवश्यक नभएको बताएको हो।

स्थानीय सरकार, स्थानीयबासी तथा घरबेटीले अर्को जिल्लाबाट आउनेको पीसीआर परीक्षणको रिपोर्ट माग्न थालेको भन्दै मन्त्रालयले त्यसो नगर्न सम्बन्धित सबैलाई आग्रह गरेको छ।

कोरोना परीक्षणको लागि निश्चित मापदण्ड भएको भन्दै अनावश्यक रुपमा परीक्षण गर्दा स्रोत÷साधनको दुरुपयोग हुने मन्त्रालयको भनाइ छ।

स्वास्थ्य मन्त्रालयका प्रवक्ता डा. जागेश्वर गौतमले एकबाट अर्को जिल्लामा जाँदा परीक्षण गर्नुपर्ने मापदण्ड मन्त्रालयको निर्देशिकामा नरहेको बताए।

उनले भने, “निर्देशिका विपरीत परीक्षण नगर्न/नगराउन स्वास्थ्यकर्मी, स्वास्थ्य संस्था, प्रयोगशाला, सरोकारवाला निकाय सबैलाई अनुरोध गर्छु।”

यात्रा गरेका व्यक्तिलाई भने क्वारेन्टिन वा होम आइसोलेसनमा बस्न मन्त्रालयले आग्रह गरेको नेपाल समयमा खबर छ ।