‘लिपुलेकसहितको भू’मि संविधानमा समेटियो‘

काठमाडौं– राष्ट्रपति विद्यादेवी भण्डारीले नेपालको संविधानको दोस्रो संशोधन विधेयक, २०७७ लाई प्रमाणीकरण गरेकी छन्।

दुवै सदनबाट सर्वसम्मतिले पारित भएको विधेयक बिहीबार राष्ट्रपतिले प्रमाणीकरण गरेसँगै लिपुलेक, लिम्पियाधुरा सहितको भूभाग औपचारिक रुपमा निशाना छापमा समेटिने भएको हो।

प्रमाणीकरण गरेसँगै लिम्पियाधुरा, कुटी, गुञ्जी, नावीसहितको भूभाग संविधानमै समेटिन पुगेको छ।

नेपालले आफ्नो भूमि लिम्पियाधुरा, लिपुलेक र कालापानी समेटेर जारी गरेको नयाँ नक्सालाई निशान छापमा राख्‍न प्रतिनिधि सभा र राष्ट्रिय सभा गरी  दुबै सदनले पारीत गरेको संविधान (दोस्रो) विधेयक राष्ट्रपति विद्यादेवी भण्डारीले बिहीबार प्रमाणीकरण गरेको राष्ट्रपति कार्यालयले विज्ञप्ति जारी गर्दै जनाएको छ । 

विज्ञप्तिमा भनिएको छ, “आज मिति २०७७ साल असार ४ गते बिहीबारका दिन सम्माननीय राष्ट्रपति श्रीमती विद्यादेवी भण्डारीज्यूले संघीय संसदको  दुवै सदनको बैठकबाट पारित भई प्रमाणीकरणको लागि पेश हुन आएको “नेपालको संविधान (दोस्रो संशोधन) विधेयक, २०७७“ नेपालको संविधानको धारा २७४ को उपधारा (१०) बमोजिम प्रमाणीकरण गर्नुभएको छ ।”