काठमाडौं । अखिल नेपाल फुटबल संघ (एन्फा) ले राष्ट्रिय पुरुष फुटबल टोलीको प्रशिक्षण जुलाई दोस्रो साताबाट सुरु गर्ने तयारी गरेको छ । 

फिफा विश्वकप २०२२ को दोस्रो चरणको छनोट अन्र्तगत घरेलु खेलका लागि खेलाडीसँग तयारीको बारेमा भएको छलफलमा प्रशिक्षण जुलाई दोस्रो साताबाट सुरु गर्ने तयारी भएको एन्फाले जनाएको छ । 

एन्फाले फुटबलको सर्वोच्च निकाय फिफा र डब्ल्यूएचओको निर्देशन अनुसार सबै सावधानी अपनाएर जुलाईको दोस्रो सातादेखि तयारी शिविर शुरू गर्न प्रतिबद्ध भएको जनाएको हो । 

नेपालले कतार विश्वकप २०२२ र एएफसी एसियन कप २०२३ अन्तर्गत छनोटको दोस्रो चरणका तीन खेल खेल्न बाँकी छ । छनोटका बाँकी खेलमा चाइनिज ताइपेई, अष्ट्रेलिया र जोर्डनसँगको खेल घरेलु मैदान दशरथ रंगशालामा हुनेछ । 

छनोट खेल अक्टोबर आठदेखि सुरु हुने तय भएको छ । छनोटको समूह बीमा रहेको नेपालले सुरुवाती पाँच खेलमा एक जित र चार हारसहित ३ अंक जोडेको छ । – बारह्खरी