काठमाडौं- पछिल्लो २४ घण्टामा देशभर ५९३ जनामा कोरोना संक्रमण पुष्टि भएको छ। जसमा १०७ महिला र ४८६ जना पुरुष छन्।

योसहित देशभर कोरोना संक्रमितको संख्या ११ हजार ७५५ पुगेको स्वास्थ्य तथा जनसंख्या मन्त्रालयले जनाएको छ। पछिल्लो २४ घण्टामा ८ महिला र ४० पुरुष गरी ४८ जना डिस्चार्ज भएका छन्।

हालसम्म कोरोना संक्रमणमुक्त भई डिस्चार्ज हुनेको संख्या २ हजार ६९८ पुगेको छ। मन्त्रालयका अनुसार आरटी पीसीआर विधिबाट पछिल्लो २४ घण्टामा ६ हजार ५३४ जनाको कोरोना परीक्षण गरिएको छ भने अहिलेसम्म २ लाख ६ हजार २७१ जनाको कोरोना परीक्षण गरिएको छ।

मन्त्रालयका अनुसार हाल देशभरका विभिन्न क्वारेन्टिनमा ७१ हजार १२ जना बसिरहेका छन्। त्यस्तै कोरोना पुष्टि भएर आइसोलेसनमा रहेका व्यक्तिको संख्या ९ हजार ३० रहेको छ।