फाइल तस्बिर 

काठमाडौं । सत्तारूढ नेपाल कम्युनिस्ट पार्टी (नेकपा)भित्र विवाद चर्किएर विभाजनको खतरा निम्तिएपछि संकटमोचनका निम्ति केन्द्रीय सदस्यहरूले हस्ताक्षर अभियान सुरु गरेका छन् । शनिबार जुम मिटिङ मार्फत ५३ जना केन्द्रीय सदस्यहरूले हस्ताक्षर अभियान सुरु गरेको केन्द्रीय सदस्य ठाकुर गैरेले जानकारी दिए ।

सचिवालय, स्थायी कमिटीले सङ्कट टार्न नसकेको भन्दै केन्द्रीय कमिटी बोलाउन माग गरिएको उनले बताए । चार सय ५३ जनामध्ये सयजना सदस्यहरूले हस्ताक्षर गरिसकेको उनले बताए ।

नेकपाको अन्तरिम विधान अनुसार कुनै पनि कमिटीका ४० प्रतिशत सदस्यले लिखित माग गरेको १५ दिनभित्र केन्द्रीय कमिटी बैठक आह्वान गर्नुपर्नेछ । स्थायी कमिटीका २० जना सदस्यले वैशाख ८ को अध्यादेश प्रकरणपछि त्यसैगरी बैठक माग गरेका थिए ।

त्यसरी माग गरिएको स्थायी कमिटी बैठक वैशाख २५ र ३१ गते रोकिएर अहिले जारी छ । शुक्रबार स्थगित भएको बैठक सोमबार ११ बजे बस्दैछ । केन्द्रीय सदस्यकाहरूले स्थायी कमिटीले समाधान दिन नसक्ने छाँट देखिएकाले केन्द्रीय कमिटी बैठक माग गरिएको बताउँँछन् ।

“उपत्यका बाहिर रहेका सदस्यलाई स्क्यान गरेर हस्ताक्षर पठाउन भनेका छौं । यो एकताका निम्ति दबाब हो । पार्टीभित्र उत्पन्न सङ्कट, विभाजनको खतरा केन्द्रीय कमिटी बसेर वृहत्तर छलफलमार्फत हल गर्नुपर्छ,” गैरेले भने । – बारह्खरी