‘आन्तरिक संरचनाहरुको समायोजन साउन १० भित्रै‘

काठमाडौं । नेपाली कांग्रेसले आफ्नो १४ औं महाधिवेशन पूर्वनिर्धारित मितिमै सम्पन्‍न गर्ने गरी कार्यतालिका सार्वजनिक गरेको छ । पार्टी केन्द्रीय कार्यालय सानेपामा सोमबार बसेको केन्द्रीय समिति बैठकले महाधिवेशनको अन्तिम मिति कायमै राखेर अन्य तल्ला तहको अधिवेशन तालिका परिमार्जन गरेको छ । 

असार १४ गतेको पदाधिकारी बैठकले तयार गरेको संशोधित कार्यतालिकालाई केन्द्रीय समिति बैठकले अनुमोदन गरेको केन्द्रीय सदस्य प्रदीप पौडेलले जानकारी दिएका छन् । पार्टीको आन्तरिक संरचनाहरुको समायोजन साउन १० भित्र सक्ने निर्णय गरेको पौडेलले बताए ।

महामन्त्री पूर्णबहादुर खड्काले केही दिनअघि केन्द्रीय कार्यसमितिमा बैठकमा कार्यतालिका संसोधनको खाका पेश गरेका थिए । प्रस्तावमध्ये पार्टीको आन्तरिक संरचान समायोजन गर्ने मितिबाहेक सबै यथावत राखेर सोमबारको बैठकले निर्णय गरेको केन्द्रीय सदस्य पौडेलले जानकारी दिए ।

उनका अनुसार केन्द्रीय अधिवेशन पूर्वनिर्धारित मिति फागुन  ७, देखि १० गतेसम्म हुनेछ । कात्तिक १६ गते देखि तल्लो तहको अधिवेशन सुरु गर्ने यसअघिको कार्यतालिका संशोधन गर्दै कांग्रेसले पुसमा पुर्‍याएको छ । 

संशोधित कार्यतालिका अनुसार पुस ८ गते, गाउँ-नगर, प्रदेशसभा पुस ११ गते, प्रतिनिधिसभा क्षेत्रका अधिवेशन पुस १३ गते गरिने छन् । त्यसैगरी प्रतिनिधिसभा क्षेत्रीय अधिवेशन र एक मात्रै प्रतिनिधिसभा निर्वाचन क्षेत्र रहेको जिल्लाका अधिवेशन पुस १३ हुने तय गरिएको छ ।

एकभन्दा बढी प्रतिनिधिसभा निर्वाचन क्षेत्र रहेको जिल्लाका अधिवेशन पुस १६ र प्रदेश अधिवेशन माघ ६ गते हुने गरी परिमार्जित कार्यतालिका सार्वजनिक गरिएको छ । – बारह्खरी