फोटो क्याप्सन : दाउरा बेच्न साफेबगर आएका महिला

अछाम ।

साफेँबगर नगरपालिका– ३ रसकाँडाकी बसन्ती सार्कि दैनिक जसो दाउरा बेच्न साँफेबगर बजार पुग्छिन् । यो उनको दैनिकी र घर चलाउनले माध्यम हो । एक भारी दाउरा बेच्न उनले आज भोली भौतारिनु पर्छ । लकडाउन र कोरोनाले गर्दा बजारका होटलहरु बन्द छन् ।

आजभोली मुस्किलले एक भारी दाउरा बेचिन्छ । एक भारी दाउरा १सय देखि १ सय ५० सम्ममा बिक्रि गर्ने गरेको उनले बताईन् । उनले भनिन् ‘दाउरा होटलमा बढी बिक्री हुन्छ,अहिले सबै बन्द छन्,भने अनुसारको मुल्य अहिले पाईदैन,कसैले सय दिन्छन् कसैले १५०। दाउरा बिक्रि हुन छोडेपछि घर चलाउन उनलाई गाहे परेको छ । लगातार एक हप्तासम्म दाउरा बेचेको पैसा जम्मा गरेर चामल किनेर खाने गरेको उनले बताईन् ।

लगाएको खेतीपाती बदेल र बाँदरले सखाप पार्न थालेपछि झनै समस्या भएको उनले दुखेसो पोखिन् । उनले भनिन्,लगाएको खेतीबाट एक महिना जति खान पुग्थ्यो,लगाएको खेती अब बादर र बदेललाई ठिक्क छ । खेतीपाती लगाउनु र नलगाउनु एउटै छ ।

भारतमा कमाउन गएका श्रीमान् लाल सार्कि ४ वर्ष पहिलो उतै घरको छतबाट लडेर मृत्यु भयो । २ छोरी र २ छोराको पालन पोषणको जिम्मेवारी बसन्तीको काधमा छ । आर्थिक अवस्था कमजोर भएका कारण उनले ३ सन्तानलाई पढाउन सकिनन् । उनले कान्छो छोरालाई भने जेनतेन पढाई रहेकि छिन् । उनको दुई छोरीको बिहे भईसक्यो ।

कल्धरी भुलको पनी दाउरा बेचेर नै गुजार चल्छ । अरुले उनको दाउरा किनेपछि मात्र कल्धरीको घरको चुलोमा आगो बल्छ । आर्थिक अभावका कारण १२ वर्षको छोरा कमाउनका लागी भारत गएको उनले बताईन् । उनले भनिन् दाउरा बेचेर जसोतसो जिन्दगी चलेको छ,छोरा छोरीलाई पढाउन सकेन,१२वर्षमै छोरा पैसा कमाउछु भन्दै भारत गएको छ । जेठि श्रीमतीबाट सन्तान नभएपछि दाने भुलले कल्धरीलाई दोस्रो श्रीमतीको रुपमा भित्तयाएका थिए । अहिले उनको १ छोरा र एक छोरी छन् । श्रीमान्ले मदिरा खाएर गाली बेईज्जत गर्ने र कुट्ने गर्न थालेपछि उनी अलग्गै सानो घर लगाएर बसेकी छिन् ।

दिला भुलको पनी समस्या उस्तै छ । भारतमा कमाउन गएका श्रीमान् कोरोनाले गर्दा रोजगार गुमाएर घर फर्केका छन् । उनका ९ छोराछोरी छन् । छोराको आसमा ७ छोरीलाई जन्म दिएकी छिन् । रोजगार गुमाएर आएका श्रीमान् र ९ छोराछोरीको लालनपालन यहि दाउरा बेचेर नै हुन्छ । उनले भनिन् ‘श्रीमान्ले भारतबाट कमाएर पठाएको पैसाले पुग्दैन,दाउरा नबेचेर घर खर्च चल्दैन,यसपालि त झन् श्रीमान् रित्तो हात फर्केका छन् ।’