गीता कुवँर, अछाम ।

अछामको साँफेबगरलाई नयाँ शहर बनाउने योजना कछुवाको गतिमा छ । सरकारले २०६८/६९ सालमा देशका १० ओटा नमूना शहर मध्ये अछामको साँफेबगरलाई पनि नमूना शहर बनाउने योजना अघि सारेको थियो । तर आवश्यक जग्गा ब्यवस्थापन हुन नसक्दा र सुचारु काम समयमै गर्न नसक्दा नयाँ शहरको काम सुस्त गतिमा छ ।

भौतिक पुर्बाधार निमार्णका लागि आयोजनाले स्थानियबासिबाट जग्गा किन्न र एैलानी जग्गा आयोजना मातहत लिन नसक्दा आयोजनाले सोचे अनुरुप काम गर्न सकेको छैन । आयोजनाले बस पार्कका लागी आवश्यक जग्गा नै खरिद गर्न सकेको छैन । आर्थिक वर्ष २०७६/०७७ मा सञ्चालित चार वटा योजना समेत सम्पन्न हुन नसकेको नयाँ शहर आयोजनाका प्रमुख मोहल बिकले बताए ।

२ करोड ९३ लाखको आयोजनाको आफ्नो भवन ८५ लाख ५६ हजारको शब दाह गृह निमार्ण, १ करोड ९५ लाख श्रीकोट गोरेटो बाटो र १ करोड ४४ लाखको साफेबगर ढल निमार्ण कार्य यो आर्थिक वर्षमा सम्पन्न हुन नसकेको हो । आयोजना प्रमुख मोहन बिकले भने ‘कोरोनाले गर्दा काम प्रभाबित भयो, गत वर्ष बस पार्कको लागी जग्गा खरिद गर्ने क्रममा स्थानीयबाट बिरोध भएपछि खरिद काम समेत प्रभाबित भएको छ ।

साँफेबगर नगरपालिकाबाट नयाँ योजनाहरु प्राप्त नहुदा यो वर्षका लागी बहुबर्षिय योजना समेत स्वीकृत हुन नसकेको नगर बिकास समितिका निबर्तमान् अध्यक्ष मोहन कुँवरले बताए । बर्षेनी बसपार्कका लागी आएको बजेट फ्रिज जाने गरेको उनले बताए । उनले भने यो वर्ष ५० लाख फ्रिज गयो, बस पार्कका लागी ३ करोड बजेट बिनियोजन हुदै आएको थियो काम हुन नसक्दा र बर्षेनी बजेट घट्दै आएको र घटेको रकम समेत फ्रिज जानेको गरेको छ ।’ नयाँ योजनाहरु कुनै पनी नरहेको र पुरानै योजनापनी हालसम्म सम्पन हुन नसकेको बताए । स्थानीय तह र आयोजना बिच समन्वकारी भुमिका हुन नसकेको उनल बताए ।

नयाँ शहर आयोजना अन्र्तगत हालसम्म साँफेबगर बजारमा १ करोड ५७ लाखको सोर्य बत्ति जडान, ६० लाखको साँफेबगर खानेपानी आयोजना निमार्ण लगायतका काम मात्र सम्पन्न भएको छ । नयाँ शहरका लागी ८० करोड बराबरको स्टेमेट तयार गरेर केन्द्र सरकारलाई पेस गरिएको छ । पहाडी क्षेत्रबाट तीव्र रुपमा भईरहेको बसाईसराई रोक्नका लागि सरकारले नयाँ शहरको अवधारणा ल्याएको भएपनि नमूना शहर निर्माणको काम भने अपेक्षाकृत रुपमा अघि बढ्न सकेको छैन ।

नयाँ शहरमा बहुउदेश्यीय हल, खेलमैदान, सपिङ कम्पलेक्स, तरकारी, फलफूल संकलन केन्द्र, बसपार्क जस्ता भौतिक पूर्वाधारहरु निर्माण गर्ने सरकारको योजना छ । जग्गा अधिग्रहण गरी चाडो भौतिक पुर्बाधार निमार्ण गर्न सके साँफेबगर नयाँ शहरको रुपमा बिकास हुनेछ । साथै सेवा सुबिधाको खोजीमा तराई तथा शहरी क्षेत्रमा भईरहेको बसाईसराई नियन्त्रण गर्ने सरकारी उदेश्य पनि पुरा हुनेछ ।