शिव खेडा प्रख्यात प्रेरक वक्ता, लेखक तथा अधिकारवादी हुन् । उनले लेखेको पुस्तक ‘यु क्यान विन’ २१ भन्दा बढी भाषामा अनुवाद भएको छ र ८ मिलियन भन्दा बढी बिक्रि भएको छ । उनको जन्म सन् १९४९ नोभेम्बर १३ मा भारतको झारखण्डमा भएको थियो ।

सफलताको लागि शिव खेडाका टिप्स

धेरैजसोको बानी सधै अरुको तथा अरुले गरेका कामको नकारात्मक आलोचना गर्ने मात्र हुन्छ । यस्ता व्यक्तिले न त आफूले प्रगति गर्छन्, न त अरुलाई अगाडी बढ्नको लागि सहयोग गर्छन् । तिमी त्यो कुरासंग सम्बन्धित नै छैनौ र यदि छौ भने त्यसलाई राम्रो बनाउनको लागि आफूले केही गरेको छैनौ भने तिमीलाई नकारात्मक आलोचना गर्ने अधिकार हुँदैन । त्यसैले अरुको नकारात्मक आलोचना गर्न छोडेर आफूले आफ्नो काम राम्रो बनाउनको लागि मेहनत गर, अरुको सक्दो सहयोग गर ।

बाँच्न त हरेक प्राणी बाँचिरहेको हुन्छ, तर तिमी केका लागि बाँचिरहेका छौ ? तिम्रो जीवनको उद्देश्य के ? यो कुराले सबैभन्दा बढी महत्व राख्छ । आफ्नो जीवनको एउटा उद्देश्य बनाऊ । जब, तिमी आफ्नो त्यो उद्देश्यका लागि बाँचेको छु भन्ने मनमा लिन्छौ, जतिसुकै अप्ठ्यारो परिस्थिति आओस्, तिमीले आफ्नो त्यो उद्देश्य पूरा गरेरै छोड्छौ ।

सफल हुन चाहन्छौ भने, सामान्य भन्दा बढी मेहनत गर । ‘ मैले यति पाएको छु भने, मैले यो भन्दा बढी किन गर्ने’ भन्ने भावना त्याग । जुनसुकै कुरामा पनि उत्कृष्ट बन्नको सामान्यभन्दा बढी लगनशील बन्नैपर्छ, थोरै भएपनि केही बढी मेहनत गर्नैपर्छ ।

आफ्नो लक्ष्यमा पूर्ण रुपले केन्द्रित बन । आफ्ना योजना तथा लक्ष्यहरुलाई लेख्ने गर । आफूले गरिरहेको कामको र पाइरहेको नतिजाको मूल्यांकन गर । आफ्ना योजना पूरा भइरहेका छन् कि छैनन्, लक्ष्यको नजिक पुगिएको छ कि छैन, आजको कामले प्रभावकारी नतिजा दिएको छ या छैन मूल्यांकन गर । यदि छैन भने, आफूले अहिले गरिरहेको काम परिवर्तन गर्नुपर्ने हो या यही काममा केही फरकपन ल्याउनुपर्ने हो, . विचार गर ।

आफ्ना साथीहरु कस्ता छन् ? संगत कस्तो छ ? राम्रोसंग हेर । तिम्रो जीवनमा तिमीले गर्ने मानिसहरुको संगतले धेरै ठूलो भूमिका खेल्छ । त्यसैले सकारात्मक सोंच भएका, हौसला दिने, काममा अगाडी बढ्न सहयोग गर्ने मानिसहरुको संगत गर । नकारात्मक सोंच भएका मानिस देखि सधै टाढा बस ।

घमण्ड नगर । सबैकुरा जानेको व्यक्ति कोही पनि हुँदैन । हरेक दिन केही नयाँ कुरा सिक्ने प्रयास गर । सुन्दर आवरणमा होइन सुन्दर चरित्रमा जोड देऊ । सफलता भनेको पैसा र प्रसिद्धि मात्र होइन भन्ने कुरालाई ध्यानमा राख ।