अछाम – जिल्लाका विभिन्न ठाउँमा सलह किराले बालीनाली खान थालेपछि किसान चिन्तामा परेका छन् । पछिल्लो एक हप्ता देखि जिल्लाका विभिन्न ठाउँमा सलह किरा देखा पर्न थालेकाे हाे ।

जिल्लाका बिनायक, कमलबजार, तुर्माखाँद, मंगलसैन लगायतका ठाउँमा सलहका झुन्ड देखिन थालेका छन् । अाफ्नाे क्षेत्रमा ३ दिनदेखि सलहका झुन्ड देखिन थालेकाे र बालीनाली समेत खान थालेकाे मंगलसैन नगरपालिका वडा नम्बर ६ का वडा सदस्य राजुदेवि भण्डारीले बताए ।

ठुलाे संख्यामा सलहका झुन्ड देखिन थालेका र बालीनालीमा क्षति गर्न थालेपछि किसानहरु समेत भाेकमरीकाे चिन्तामा परेका वडा सदस्य भण्डारीको भनाइ छ । सलहकाे झुण्ड गाउँमा पसेकाे र बालीनाली खाएर नाेक्सानी गर्न थालेकाे मंगलसैन ७ का स्थानीय नवीन बिष्टकाे भनाइ छ ।

ठुलाे संख्यामा सलहकाे झुन्ड अामाशभरी देखिन थालेका र बालीनालीमा समेत नाेक्सानी गर्न थालेका बिष्टको भनाइ छ । केही दिन अघि जिल्लाका कुईका, विनायक लगायतका क्षेत्रमा पनि सलह देखिएकाे थियाे ।

सलह किरा दैलेख हुँदै अछाम जिल्ला प्रवेश गरेकाे पञ्चदेवल विनायक नगरपालिकाका प्रमुख देवराज देवकोटाले बताउनुभयो । सलहले मकै, काेदाे, धान लगायतका बालीनालीमा क्षति गर्न थालकाे छ । सलह अाकाशभरी देखिन थालेकाे छ ।

सलह भगाउन स्थानीयले हाेहल्ला गर्ने, अागाे बालेर धुँवा निकाल्ने लगायतका कार्य समेत गर्न थालेका छन् । मकै तथा धान छर्ने बेलामा समेत अछाममा अमेरिकी फाैजी किरा र फेदकटुवा किराले प्रकाेपकाे रुप लिएको थियाे । धेरै ठाउँका किसानहरुले दुईपटक सम्म मकै लगाएका थिए ।