अछाम – नेपाली काङ्ग्रेस रामारोशन गाउँपालिकाले बाढी पिडितका लागि सुरु गरेको राहत संकलन तथा उद्वारमा रकम संकलन हुने कार्यले तिव्रता पाएको छ । राहतका लागि धेरै क्षेत्रबाट सक्रिय सहयोग प्राप्त भईरहेको समितिका संयोजक पुष्प बिष्टले बताए ।

भदौ २ गते रामारोशन क्षेत्रमा भीषण बर्षासँगै आएको बाढीले बेपत्ता, मृतक, विस्थापित तथा पिडित परिवारका लागि सहयोग स्वरुप राहत संकलन अभियान सुरु गरिएको थियो । संकलनका लागि खडा गरिएको कोषमा बुधबार मात्रै १ लाख ८७ हजार ६ सय ११ रुपैयाँ जम्मा भएको छ ।

बाढी पिडितको सहयोगको लागि भन्दै अछाम क्षेत्र नं. २ बाट प्रतिनिधत्व गर्ने प्रतिनिधि सभा सदस्य रामबहादुर बिष्टले १ लाख ११ हजार १ सय ११ रपयाँ सहयोग गरेका छन् । उनले बिस्थापित र पिडित परिवारका लागि केही हद्सम्म राहत मिलोस भन्दै सहयोग गरेको बताए । साथै उनले सबैले यस अप्ठेरो परिस्थितीमा सहयोग गर्न समेत आग्रह गरे ।

साँसद बिष्टले बुधबार सहयोग रकम पठाएका संकलन समिति संयोजक बिष्टले बताए । यस्तै बान्निगढी जयगढ ६ दर्ना स्थायी घर भइ हाल जापानमा रहनु भएका ज्ञानेन्द्र बहादुर शाहबाट ५५ हजार ५ सय रकम प्राप्त भएको छ भने ट्रेड युनियन काङ्ग्रेस जिल्ला कार्य समिति अछामले पनि २५ हजार सहयोग गरेको छ ।

विपतको समयमा सबैखालको सहयोग गरिदिन समेत नेपाली काङ्ग्रेस रामारोशनले सबैमा आग्रह गरेको छ ।