बाजुरा – जिल्लाको बडीमालिका नगरपालिका वडा न ७ जिल्लीको तल्लो पलान भैसी छानोमा लुकाएर राखेका  ५ नाल भरुवा बन्दुक सहित चार जनालाई प्रहरीले नियन्त्रणमा लिएको छ।

नगरपालिका ७ बस्ने चार जनालाई प्रहरीले शुक्रबार दिउँसो नियन्त्रणमा लिएको हो भने एक जना फरार रहेको जिल्ला प्रहरी कार्यालय बाजुराका प्रहरी नायव उपरिक्षक टंकप्रसाद भट्टराइले बताए ।

पक्राउ पर्नेमा सौरे लुहार, सुरेन्द्र लुहार, दलवीरे चदारा र धन लुहार रहेको प्रहरी प्रवक्ता लोकेन्द्रसिं ठगुन्नाले जानकारी दिए । उनले दिएको जानकारी अनुसार गोरख लुहार भने फरार रहेको बताए।

पक्राउ परेका चार जना र फरार रहेका एक जनाबाट एक/एक नाल भरुवा बन्दुक, बन्दुकमा प्रयोग हुने गोली बारुद समेत बरामद गरेको प्रवक्ता ठगुन्नाले बताए । फरार रहेका गोरख लुहारको खोजी कार्य भइरहेको प्रहरीले जनाएको छ । 

जिल्ला प्रहरी कार्यालय बाजुराको प्रहरी गस्तीको टोलीले बन्दुक लुकाएर राखेको गोप्य सुचनाका आधारका पक्राउ गरेको प्रवक्ता ठगुन्नाले बताए । पक्राउ परेका चारै जनालाई हातहतियार ऐन सम्बन्धी मुद्धा चलाउने तयारी प्रहरीले थालेको छ ।

पक्राउ परेका चार जनालाई जिल्ला प्रहरी कार्यालय बाजुराको हिरासतमा राखिएको प्रहरी प्रवक्ता ठगुन्नाले बताए ।