एजेन्सी । क्यारेबियन प्रिमियर लिग (सीपीएल) टी-ट्‍वान्टी क्रिकेटमा आज (मंगलबार) सन्दीप लामिछाने रहेको टिम जमैका तलाबाजले सातौं खेल खेल्दै छ ।

आज हुने जमैका र ट्रिनबागो नाइट राइडर्सबीचको खेल नेपाली समयअनुसार बेलुका ७:४५ बजे सुरु हुनेछ । ब्रायन लारा स्टेडियममा जमैकाले सातौं खेलमा लिग लिडर ट्रिनबागो नाइट राइडर्ससँग प्रतिस्पर्धा गर्न लागेको हो ।

आजको खेलमा जमैका चौथो जितको खोजीमा हुनेछ । अपराजित नाइट राइडर्सविरुद्ध मैदान उत्रँदा जमैकालाई भने केही डर हुनेछ । उता नाइट राइडर्स भने जमैकालाई हराएर लगातार सातौं जित निकाल्ने योजनामा हुनेछ ।

दुई टोलीबीच भएको पहिलो खेलमा नाइट राइडर्सले ७ विकेटले हराएको थियो । आजको खेलमा पनि जित निकाल्दै आफ्नो विजयी यात्रा कायम गर्न चाहन्छ । जमैका ६ खेलमा ६ अंक जोडेर तालिकाको चौंथो स्थानमा रहेको छ । नाइट राइडर्स ६ खेलमा १२ अंक जोडेर शीर्ष स्थानमा छ ।

सन्दीपले यो सिजन सीपीएलमा उत्कृष्ट प्रदर्शन गरिरहेका छन् । सन्दीप ६ खेलमा ९ विकेट लिन सफल भइसकेका छन् ।