संचालन हुन लागेको प्रयोगशालाको अवस्था बुझ्न प्रदेश स्वास्थ्य निर्देशक डा. अवस्थीको टोली कमलबजारमा

अछाम – जिल्लाको कमलबजार नगरपालिका नोभेल कोरोना भाईरस कोभिड १९ को परिक्षणका लागि स्थापना गर्न लागिएको प्रयोगशला संचालनको अन्तिम तयारीमा पुगेको छ । जिल्लाको एक स्थानिय तहको पहलमा भईएको प्रयोशाला संचालनको काम ९५ प्रतिशत भन्दा बढी पुगिसकेका कारण अब केही दिनमै संचालन हुने नगरपालिकाले जनाएको छ ।

कमलबजार नगरपालिकाको पहलमा संचालनमा आउन लागेको प्रयोगशाला स्थापनाका लागि पूर्वी अछामका ढकारी, तुर्माखाँद गाँउपालिका र पञ्चदेवल बिनायक नगरपालिकाले साथ दिएका छन् ।
कमलबजार प्राथमिक स्वास्थ्य केन्द्रमा संचालनको अन्तिम चरणमा रहेको पिसिआर मेसिन तथा प्रयोगशालाको गुणस्तर लगायतका अवस्थाको बारेमा जानकारी दिन प्रदेश स्तरिय एक स्वास्थ्य टोलिले अनुगमन गरेको छ ।

सुदुरपश्चिम प्रदेश स्वास्थ्य निर्देशनालयका निर्देशक डा गुणराज अवस्थीको टोलिले पिसिआर मेसिनको गुणस्तर तथा संचालनको तयारी र अन्य अवस्थाका बारेमा जानकारी लिएको छ ।
निर्देशक डा. अवस्थीले दुर्गममा पिसिआर मेसिन संचालनको प्रयास गरेकोमा कमलबजार नगरलाई धन्यवाद दिएका छन् । उनले यसको सुरुवात मत्रै नभई निरन्तरतामा जोड दिनुपर्ने बताए ।

प्रयोगशालाको नियमित संचालनका लागि जिल्लाका दश वटै स्थानिय तहले साथ दिनुपर्ने उनको भनाई छ । पिसिआर मेसिन संचालनका लागि प्रयोगशालामा आवश्यक पर्ने सहयोग प्रदेशको तर्फबाट गर्न आफु तयार रहेको समेत उनले बताए ।

अनुगमन टोलीमा सहभागी सेती प्रादेशिक अस्पतालका प्रयोगशाला प्रमुख रमेश शाहीले मेसिनको परिक्षणका लागि पहिले टेस्ट भएका नेगेटिभ र पोजेटिभ नमुना जाँच गरिने बताए । असोज १५ गते सम्ममा कमलबजारको प्रयोगशालामा पिसिआर जाच भएको नमुना अन्य प्रयोगशालामा जाँच गरि अन्तिम रुप दिने तयारी भईरहेको प्रमुख शाहीको भनाई छ ।

अहिलेको कठिन परिस्थितीमा पिसिआर मेसिन संचालनको लागि ठुलो चुनौती भएको भन्दै नगरप्रमुख ओमप्रकाश बिष्टले आफुले अप्ठेरो परिस्थितीका बाबजुत पनि काम अघि बढाएको बताए । विविध कारणबस केही मेसिन संचालन गर्न ढिलाई भएपनि अब छिट्टै अछामी जनताको पिसिआर कमलबजार बाट हुने उनको विश्वास छ । कमलबजारमा पिसिआर मेसिन संचालनमा आएपछि कमलबजार सहित जिल्लाको समग्र कोराना परिक्षणको दायरा फराकिलो हुने विश्वास समेत नगर प्रमुख बिष्टको छ ।

तर यता बयालपाटा अस्पतालमा साउन महिना भित्रै पिसिआर परिक्षणका लागि मेसिन जडान सहित प्रयोगशाला संचालनमा ल्याउने प्रतिबद्धा गरिएपनि असोज महिना सम्म पनि कुनै सुनुवाई भएको छैन । सुदूरपश्चिम प्रदेश सरकारका कानुन तथा मामिला मन्त्री प्रकाश शाहले अछाम र बाजुरालाई लक्षित गर्दै बयालापाटा अस्पतालमा पिसिआर मेसिन संचालन गरिने उद्दघोष गरेका थिए । उनले अस्पताल भम्रणका क्रममा प्रदेश सरकारले बयालपाटा अस्पतालमा पिसिआर मेसिनको लागि सबै तयारी भईसकेकाले श्रावण महिना भित्रै संचालन गरिने प्रतिबद्धता जनाएका थिए ।

यस्तै साँफेबगरमा समेत जनस्तरबाट पिसिआर मेसिन संचालन गर्ने भनेर आर्थिक अभियान सुरु गरिएपनि त्यो अधुरै भएको छ । अछाम, बाजुरा तथा डोटी जिल्लाका समेत नागरिकको परिक्षण सहज पार्ने भनेर गएको असारमै आर्थिक संकलन अभियान गरिएको थियो । सुरुवातमै ४ देखी ५ लाख सम्म रकम संकलन भएपनि अभियानले पूर्णता पाउन सकेन् ।