एजेन्सी । सुर्यकुमार यादवको अर्धशतकको मद्दतमा यूएईमा जारी इन्डियन प्रिमियर लिग (आईपीएल) टी–ट्वान्टी क्रिकेटअन्तर्गत मुम्बई इन्डियन्सले राजस्थान रोयल्सलाई जितका लागि १९४ रनको लक्ष्य दिएको छ ।  

शेख ज्यायद स्टेडियममा टस जितेर पहिले ब्याटिङ गरेको मुम्बईले निर्धाति २० ओभरमा ४ विकेट गुमाउँदै १९३ रन बनायो । 

मुम्बईका लागि सुर्यकुमार यादवले अर्धशतकीय पारी खेले । ४७ बल खेलेका उनले ११ चौका र २ छक्काको सहयोगमा ७९ रन बनाए । त्यस्तै रोहित शर्माले ३५ रन जोड्दा हार्दिक पान्ड्या ३० तथा क्विन्टन डिककले २३ रन बनाए । 

बलिङतर्फ श्रेयस गोपालले दुई विकेट लिए । त्यस्तै जोफ्रा आर्चर र कार्तिक त्यागीले समान एक–एक विकेट लिए । 

मंगलबारको खेलमा दुबै टोली जित निकाल्ने योजनामा छन् । लिगको छैटौं खेल खेल्दै गर्दा मुम्बई आजको खेलमा जित निकाल्दै तालिकाको शीर्ष स्थानमा उक्लने योजनामा छ । लिगका पाँच खेलमा मुम्बईले तीन खेलमा जित निकाल्न सफल भएको छ । 

यता लिगको पाँचौ खेल खेल्दै गरेको राजस्थान आजको खेलमा जित निकाल्दै तालिकाको चौथो स्थानमा उक्लने योजनामा छ । लिगमा उपाधि दावेदार मानिएको राजस्थान आजको खेलमा सहज जितको अपेक्षा छ ।