काठमाडौं । नेपाली कांग्रेसकी नेतृ सुजाता कोइरालाले १४ औं महाधिवेशनमा सभापति पदमा लड्ने तयारी गरेकी छन् । जीपी कोइराला फाउन्डेसन अमेरिकाले सोमबार आयोजना गरेको भर्चुअल संवादमा उनले पार्टीको वर्तमान नेतृत्व परिवर्तनका लागि आशन्न महाधिवेशनमा सभापति पदमा लड्ने बताएकी हुन् ।

नेतृ कोइरालाले अहिलेसम्मको शैलीबाट पार्टी चल्न नसक्ने भन्दै आगामी दिनमा पार्टीलाई नयाँ ढंगबाट अगाडि बढाउनुपर्नेमा जोड दिइन् । “पुरानै ढंगबाट पार्टी चल्न सक्दैन । अब नयाँ ढंगबाट पार्टीलाई अगाडि लिएर जानु पर्दछ,” उनले भनिन्, “त्यसका लागि हामीहरुले युवालाई, महिलालाई अत्याधिक रुपमा क्रियाशील (सदस्यता) दिनुपर्छ । उनीहरुको नेतृत्वलाई अगाडि बढाउनुपर्छ ।”

कोइरालाले पार्टी सभापति शेरबहादुर देउवाको नाम नलिए पनि घुमाउरो शैलीमा पार्टी सञ्चालन गर्न नसकेको समेत आरोप लगाइन् । “माथिल्लो लेवलमा लिडरसिपको कमी पनि देखियो । यो मैलेमात्रै भनेको होइन । नेपाली कांग्रेसका यो सबैले महसुस गरिरहेका छन्,” उनले भनिन्, “विकास निर्माणको योजना, सोच र दृष्टिकोण केही छैन, यसरी पार्टी चल्छ ? प्रतिपक्ष हुँदा पनि काम गर्ने हो । सुतेर बस्ने होइन ।”    

पार्टीमा परिवर्तन ल्याउन र अहिले देखिएका अनुहारलाई परिवर्तन गर्न सक्छु भनेरै आफू सभापति पदमा उमेदवारी दिने तयारीमा जुटेको कोइरालाको भनाइ थियो । उनले बाह्रखरीसँगको संक्षिप्त कुराकानीमा मंगलबार उमेदवारीका विषयमा तिहारपछि औपचारिक रुपमा बोल्नेसमेत प्रतिक्रिया दिएकी छन् ।

“म सभापतिमा उमेदवारी दिन्छु भनेर भन्दै आएकी छु । हिजो (सोमबार) पनि एउटा जुम मिटिङमा आप्mनो उमेदवारीका विषयमा भनेकी थिएँ,” नेतृ कोइरालाले उमेदवारीका सम्बन्धमा बाह्रखरीले राखेको जिज्ञासाको जवाफ दिँदै भनिन्, “बाँकी कुरा अब तिहारपछि गरौंला । अहिले एउटै कुरा बारबार के भनिराख्नु ।”

कांग्रेसले १४ औं महाधिवेशन आगामी फागुन ७ देखि १० सम्म काठमाडौंमा आयोजना गर्ने घोषणा गरिसकेको छ । तर, कोभिड–१९ का कारण कांग्रेसले महाधिवेशनका लागि तयार गरेको कार्यतालिकाअनुसार कार्यसम्पादन भने गर्न सकेको छैन ।

महाधिवेशनको तयारीका बारेमा छलफल गर्न कात्तिक २७ गते कांग्रेसको केन्द्रीय कार्यसमिति बैठक बस्दैछ । उपसभापति विमलेन्द्र निधि र पूर्वमहामन्त्री कृष्णप्रसाद सिटौलाको सुरक्षार्थ खटिएका सुरक्षाकर्मीमा कोरोना भाइरसको संक्रमण देखिएका कारण कांग्रेसले २४ गतेका लागि तय गरेको बैठक पछि सारेको छ । फाइल तस्बिर