काठमाडौं- पार्टीको सचिवालय बैठक रोक्न जोडबल गर्दै आएका नेकपा अध्यक्षसमेत रहेका प्रधानमन्त्री केपी शर्मा ओलीले सचिवालयको बैठक डाकिएकै समयमा मन्त्रिपरिषद्को बैठक राखेका छन्। 

मन्त्रिपरिषद्को बैठक सामान्यतया सोमबार र बिहीबार बस्ने गरेको छ। तर, बुधबार कुनै विशेष एजेन्डाबिनै प्रधानमन्त्री ओलीले मन्त्रिपरिषद्को बैठक डाकेका हुन्। 

नेकपाको शुक्रबार बसेको सचिवालयको बैठकले आज दिउँसो १ बजे बैठक बस्ने तय गरेको थियो। प्रधानमन्त्री ओलीले ठिक १ बजे नै मन्त्रिपरिषद्को बैठक राखेका छन्।

एक मन्त्रीले आफूलाई १ बजे मन्त्रिपरिषद् बैठक बस्ने जानकारी आएको पुष्टि गरे। ‘मलाई मोबाइलमा १ बजे मन्त्रिपरिषद्को बैठक बस्ने भनेर खबर आएको छ’, उनले भने।

प्रधानमन्त्रीले सचिवालय बैठककै समयमै मन्त्रिपरिषद्को बैठक बोलाएकाले उनी पक्षीय समूह सचिवालय बैठक बस्न तयार नभएको जनाउ दिएको छ।