अछाम : मंगलसेन नगरपालिकाको नवनिर्मित भवनको उदघाटन गरिएको छ । आईतबार एक कार्यक्रमको आयोजना गरी नगर प्रमुख पदम बहादुर बोहराले भवनको उदघाटन गरे।

भवनको निर्माण कार्य सम्पन्न भईसकेपछि एक कार्यक्रमको अायोजना गरि उदघाटन गरिएको नगरपालिकाका सुचना अधिकारी बिष्णु प्रसाद जैसीले जानकारी दिए । अब केही दिन भित्र नगरपालिकाको नवनिर्मित भवन बाट सेवा प्रवाह गरिने नगरपालिकाका निमित्त प्रमुख प्रशासकीय अधिकृत खकेन्द्र बहादुर सोडारीले बताए ।

भवन निर्माणका लागि ४ करोड ९३ लाखको स्टमेट गरिएको र ३ करोड ६९ लाखमा ४ तलाको अत्याधुनिक भवन रोयल कन्ट्रक्सन निर्माण सेवा धनगढीले भवन निर्माण गरेको नगरपालिकाका ईन्जिनियर खम्म केसीले बताए । यसअघि साबिकको मंगलसेन गाविसको पुरानो भवनबाट सेवा प्रवाह गरिरहेको नगरपालिकाले अब नवनिर्मित भवनबाट सेवा प्रबाह गर्ने भएपछि सेवाग्राही र सेवाप्रदायकलाइ सहज हुने भएको छ ।

भवनको अभावले विभिन्न समस्या हुन्थ्यो अब सहज हुने नगरपालिकाका कर्मचारीहरूले बताएका छन । भवनको उदघाटन कार्यक्रममा मंगलसेन नगरपालिका वडा न ६ का अध्यक्ष जनकराज भण्डारी, वडा न ३ का अध्यक्ष पदम सिं भाट, वडा न ५ का अध्यक्ष हरि प्रसाद ढुंगाना , ११ का अध्यक्ष डबल सिं भण्डारी , ७ का अध्यक्ष शिद्वराज ढुंगाना, १३ का अध्यक्ष प्रेम बहादुर थापा लगायत नगरपालिकाका कर्मचारीहरूको सहभागीता रहेको थियोे । मंगलसेन नगरपालिकाको नवनिर्मित भवन मंगलसेन नगरपालिका वडा न ५ मा रहेको छ ।