डाेटी – कारको ठक्करबाट बालकको ज्यान गएको घटनालाई लिएर आफन्तले डाक्टर केआईसिंह राजमार्ग बन्द गरेका छन् ।

बिहीबार राति डोटीको शिखर नगरपालिका-६ तल्कोटमा कारको ठक्करबाट ८ वर्षका बालक गोरख बलायरको ज्यान गएको घटनालाई लिएर आफन्तले डडेल्धुराको स्याउले र डोटीको दिपायल जोड्ने डाक्टर केआईसिंह राजमार्ग बन्द गरेका हुन् ।

उनीहरुले मृतकका परिवारलाई उचित क्षतिपूर्तिको माग गरेका छन् । बाटो बन्द भएपछि गाडी तथा यात्रु शिखर नगरपालिका-६ तल्कोटमा अलपत्र परेका छन् ।

राजमार्ग खुलाउन पहल भइरहेको प्रमुख जिल्ला अधिकारी भीमप्रसाद भट्टराइले बताए । बालकलाई ठक्कर दिने से १ त १००९ नम्बरको कार चालक कैलाली धनगढी उपमहानगरपालिका-१ का माधव गिरीलाई प्रहरीले पक्राउ गरेको छ ।