काठमाडौं। आज उच्च हिमाली क्षेत्रमा हिमपातको सम्भावना छ। सुदूरपश्चिम र प्रदेश १ का  उच्च हिमाली भू-भागका एक-दुई स्थानमा हल्का हिमपातको सम्भावना रहेकाे मौसम पूर्वानुमान महाशाखाले जनाएकाे छ।

हाल देशमा पश्चिमी वायुको सामान्य प्रभाव छ। आज दिउँसो सुदूरपश्चिम र कर्णाली प्रदेशमा आंशिकदेखि सामान्य बदली रहने छ।

साथै गण्डकी र प्रदेश १ का पहाडी भू-भागमा आंशिक बदली रहने र बाँकी भू-भागमा मौसम सामान्यतया सफा रहने महाशाखाले जनाएको छ। त्यस्तै रातिको समयमा गण्डकी र  प्रदेश १ को पहाडी भू-भागमा आंशिकदेखि सामान्य बदली रहने महाशाखाले जारी गरेको बुलेटिनमा उल्लेख छ। 

देशभरकाे तापक्रम चिसो रहिरहने तथा तराई/पहाडी भू-भागका केही स्थानमा बिहानीपख हुस्सु/कुहिरो लाग्ने गरेकाे छ। जसकारण वायुको पारदर्शितामा कमी हुन गई  सडक तथा हवाई यातायात प्रभावित हुन सक्ने सम्भावना रहेकोले आवश्यक सतर्कता अपनाउन महाशाखाले अनुराेधसमेत गरेकाे छ।