काठमाडौं । मध्यपूर्वी राष्ट्र सिरियाकोे हिमवर्ती क्षेत्रमा नेपाली शान्ति सैनिकले सन् २०१३ देखि नै दिँदै आएको शान्ति सुरक्षा निरन्तर जारी छ ।

नेपाली सेनाको जनसम्पर्क तथा सूचना निर्देशनालयका अनुसार संयुक्त राष्ट्र संघको यूएनडीओएफ अन्तर्गत रहेर नेपाली शान्ति सैनिकले सिरियाको अति संवेदनशील माउण्ट हर्मनको २० फिटको हिउँ र माइनस २० डिग्री सेन्टिग्रेडको चिसो सिरेटोमा आफ्नो जिम्मेवारी निर्वाह गर्दै आइरहेको छ । 

यस क्षेत्रको स्वामित्वको विषयलाई लिएर ४६ वर्षदेखि सिरिया र इजरायलबीच विवाद कायम रहेकोले शान्ति सैनिकहरु तैनाथ भएका हुन् ।

विश्वको सबैभन्दा अग्लो स्थानमा शान्ति सैनिक तैनाथ भएको उक्त क्षेत्रमा अहिले पनि ठूलो संख्यामा विद्युतिय धरापहरु छन् भने द्वन्द्वरत सशस्त्र समूहहरुको चलखेल पनि बढी नै हुने गरेको विज्ञप्तीमा उल्लेख छ । 

करिव ६ महिना हिमपात हुने उक्त गोलान क्षेत्रमा खटिने अधिकांश फौजहरु मुस्ताङ्ग जिल्लाको कैसाङ्गस्थित उच्च शिखर तालिम शिक्षालयबाट हिमाली युद्धकलासम्बन्धी तालिम प्राप्त गरी हिमपात र विकट भुगोलमा काम गर्न दक्षता प्राप्त गरेका हुन् ।

उक्त इलाकामा हिउमा प्रयोग गरिने विशेष किसिमको सवारी साधनहरु पिस्टन बुली, स्किडो र स्कीको प्रयोग गरी सैनिक कारवाहीहरु संचालन गरिन्छ ।