काठमाडौं- निर्वाचन आयोगले बिहीबारदेखि २१ गतेसम्म देशभरका सबै स्थानीय तहका केन्द्रमा मतदाता नामावली अद्यावधिक (दाबी विरोधसमेत) कार्यक्रम सञ्चालन सुरु गरेको छ। 

कार्यक्रमअनुसार पहिलो दिन नगरपालिका र गाउँपालिकाको केन्द्रमा मतदाता नामावली प्रकाशन गरिएको छ।

१६ गतेदेखि १८ गतेसम्म मतदाता नामावलीमा रहेका त्रुटि सच्याउन, दोहोरो नाम हटाउन निवेदन दिन तथा मृत्यु भएका र नागरिकता त्याग गरेका मतदाताको नाम हटाउन सूचना दिइने निर्वाचन आयोगले जनाएको छ।

कसैले झुटा विवरण दिई मतदाता नामावलीमा नाम समावशे गरेको भए त्यसको विरोधमा माघ १६ र १७ गते उजुरी दिन सकिने आयोगको सूचनामा उल्लेख छ।

आयोगले निर्धारित मितिमा सम्बन्धित स्थानीय तहको केन्द्रमा गई मतदाता नामावलीमा रहेको आफ्नो नाम वा विवरणमा त्रुटि भए सच्याउन, दोहोरो नाम भए हटाउन, मृत्यु भएका वा नागरिकता त्यागेका मतदाताको नाम हटाउन सूचना दिन र कसैले झुटा विवरण दिएको भए सोको विरोधमा उजुरी दिन सबैलाई आग्रह गरेको छ।