काठमाडौं । नेकपा (एमाले) का नेता भीम रावलले कवितामार्फत नयाँ वर्षको शुभकामना दिएका छन् । मंगलबार साँझ सामाजिक सञ्जाल ट्विटरमार्फत नेता नेता रावलले कविताबाट नयाँ वर्षको शुभकामना दिएका हुन् ।

उनले कवितामार्फत राष्ट्रिय एकता बलियो बनोस् भन्ने कामना गरेका छन् । नेता रावलले स्वेच्छारी, अत्याचारीको पतन होस् भन्ने पनि कामना गरेका छन् । उनले बालुवाटारमा विदेशी जासुस पुग्ने प्रवृत्तिको अन्त्य हुनुपर्नेमा पनि जोड दिएका छन् ।

नेता रावलको कविता :

नौलौ वर्ष हर्ष बढोस्, कोही नहोउन् दुःखी यहाँ
स्वाधीनता, स्वाभिमान देशको सबै सबल बनोस् जहाँ,
स्वेच्छाचारी, अत्याचारी सबको शीघ्र होओस् पतन
देशभक्ति सर्वत्र ढकमक्क भइ यहाँ होस् सुशासन ।

नमिचियोस् सीमा देशको यो धरती मुस्कुराइ रहोस् 
हस्तक्षेप पराईको सबैका विनाश हुँदै जाओस्,
सूर्य–चन्द्र ध्वजा उठोस् सगरको माथि–माथि
विदेशी जासूस नपुगोस् कोही बालुवाटार राती ।

समृद्धि फैलियोस् समाजमा लालिमाझैं वसन्तको
पूरा हुँदै जाउन् सधैँ इच्छा, आशा अन्तरमनको,
जीवन सदा स्वस्थ्य रहोस्, कोरोना नष्ट भइ जाओस्
पंख फिजाइ खुशियाली सर्वत्र घर–घरमा पुगोस्