अछाम । अछाम जिल्लाको कमलबजार नगरपालिकामा संचालन भएको पिसिआर प्रयोगशालामा आर्थिक अभाव देखिएको छ । प्रयोगशाखा संचालनका लागि बजेटको उचि व्यावस्थापन हुन नसक्दा संचालनमा कठिनाई भईरहेको प्रयोगशालाले जनाएको छ ।

कमलबजार नगरपालिकाको पहल तथा लगानी र अन्य स्थानिय तहको सहयोगमा संचालन भएको प्रयोगशालाका लागि अर्को भरपर्दो बजेटको श्रोत नहुदाँ दैनिक पिसिआर परिक्षण गर्न समेत कठिनाई भईरहेको कमलबजार नगरपालिकाका निमित्त प्रमुख प्रशासकीय अधिकृत खड्क बिष्टले बताए ।

सुरुमा केहि स्थानिय तहबाट बजेट प्राप्त भएपनि पछिल्लो समयमा बजेट नआउदा एक्लै कमलबजार नगरपालिकाकले धान्न कठिनाई भएको अधिकृत बिष्टको भनाई छ । प्रयोगशाला स्थापना भएको ८ महिना जति भयो हामीले आफ्नै नगरपालिकाको श्रोतमा प्रयोगशाला नियमित संचालन गर्यौँ तर अहिले आर्थिक अभाव देखिएको उनले बताए ।

प्रयोगशाला स्थापना देखि नै त्यहाँ स्वाव दिन आउने कुनै पनि बिरामी संग शुल्क नलिएर निशुल्क रुपमा कोरोना भाईरसको परिक्षण गर्दै आईरहेको छ । जिल्लाका अन्य स्थानिय तहहरुबाट घोषणा गरिएकै रकम नआउदाँ पनि झन् समस्या भएको नगरपालिकाका उपप्रमुख भमुसिरण बजगाईले बताईन् ।

हामीले जिल्लाका सबै तहबाट प्रयोगशालाका लागि बजेट आउछ भन्ने सोचेर सबै परिक्षण निशुल्क गर्यौँ तर अहिले भने अनुरुप बजेट नआउदाँ समस्या भयो उनले भनिन् । हरेक सरकारी पिसिआर परिक्षण प्रयोगशालामा कोरोना परिक्षण गर्दा १ हजार शुल्क लिने प्रावधान छ तर कमलबजारमा सबै निशुल्क गरेको उनको भनाई छ ।

समयमै बजेटको व्यावस्था नभए प्रयोगशाला बन्द गर्नु पर्ने अवस्था समेत आउन सक्ने उनको भनाई छ । सो अवस्था आउन नदिन र प्रयोगशालालाई नियमित संचालनमा राख्न नगरपालिकाले जिल्लाका सबै स्थानिय तहसंग आर्थिक सहयोगको माग गरेको छ ।

पछिल्लो समयमा नयाँ भेरियण्टको कोरोना संक्रमण फैलिएको र यसको रोकथाम तथा नियन्त्रण गर्न पिसिआर परिक्षण मात्रै एक भरपर्दो माध्यम भएकाले प्रयोगशालाको नियमित संचालनका लागि अािर्थक सहयोग गर्न आग्रह गरिएको छ ।

प्रयोगशालाले हाल सम्म ४ हजार ५ सय ९० जनाको पिसिआर परिक्षण गरेको छ भने जसमा ६ सय ४४ जनाको कोरोना पुष्टी भएको थियो ।