काठमाडौं । नर्भिक अस्पतालमा उपचाररत निशा घिमिरेको स्वास्थ्यमा सुधार आएको छ । नवजीवनका संस्थापक अध्यक्ष दुर्गानाथ दाहालले एक दिनमै निशाको स्वास्थ्यमा सुधार आएको जानकारी दिए ।

भारतमा सवारी दुर्घटनामा परेकी निशा घिमिरेको आर्थिक अभावमा तीन वर्षदेखि उपचार हुन पाएको थिएन । नवजीवन परोपकार समाज र नर्भिक अस्पतालकी निर्देशक मेघा चौधरीको प्रयासमा बिहीबारदेखि निशाको उपचार नर्भिक अस्पतालमा भइरहेको छ ।

निशाको उपचार गर्न नसकेपछि उनका बुबाले नवजीवन परोपकार समाजका संस्थापक अध्यक्ष दाहाललाई खबर गरेका थिए । त्यसपछि दुर्गानाथले निशाको उपचार गर्ने पहल कदमी अगाडि बढाउँदै निशाको तस्बिर सामाजिक सञ्जालमा पोस्ट गरेका थिए । 

त्यसपछि सो पोस्ट नर्भिक अस्पतालकी निर्देशक तथा नवजीवन परोपकार समाजकी प्रमुख संरक्षक मेघा चौधरीले देखेपछि उनले नर्भिक अस्पतालमा निशुल्क उपचार गरिदिने बताएकी थिइन् । 

नवजीवनले निशाको अवस्था थाहा पाएको दुई दिनमा अस्पताल लगिएको दुर्गानाथले बताए ।

सबै तस्बिरहरू : दुर्गानाथ दाहाल