विश्व स्वास्थ्य संगठन (डब्ल्यूएचओ)ले कोरोनाको नयाँ स्वरुप डेल्टा विश्व भर तीब्र रुपमा फैलिरहेको दाबी गरेको छ। डब्ल्यूएचओका अनुसार डेल्टा विश्वका १०४ देशमा फैलिसकेको छ। यो विश्वभर नै हावी हुनसक्ने डब्ल्यूएचओको अनुमान छ।

डब्ल्यूएचओका प्रमुख टेड्रोस एड्हानोम गहब्रहयससले पछिल्लो चौथो हप्तामा यो भेरिएन्ट विश्वभर तीब्र रुपमा फैलिरहेको बताएका छन्। 

पछिल्ला १० हप्ता यता कोरोना संक्रमण विश्वमै घटिरहेको थियो। तर, डेल्टा भेरिएन्ट फेरि पछिल्लो चार हप्ता यता तीब्र रुपमा फैलिरहेको हो। टेड्रोस एड्हानोमले उक्त संक्रमणबाट ज्यान गुमाउनेको संख्या पनि बढीरहेको भन्दै चिन्ता व्यक्त गरेका छन्। डेल्टा भेरिएन्ट अधिक संक्रामक भएकाले उच्च सावधानी अपनाउन आग्रह गरिएको छ।

जुन देशमा खोप अभाव छ त्यो देशमा यो भेरिएन्ट झनै तीब्र रुपमा फैलिने चिन्ता व्यक्त गरिएको छ। अमेरिकाको ब्राउन यूनिभर्सीटीका स्कुल अफ पब्लिक हेल्थका डीन डा. आशिष झाले खोप नलगाएको क्षेत्रमा यसको संक्रमण तीब्र रुपमा फैलिरहेको बताएका छन्। 

अस्ट्रेलिया, इजराइल र लक्षिण अफ्रिकामा डेल्टा भेरिएन्ट तीब्र रुपमा फैलिरहेको छ। यदि मानिसमा दोस्रो पटक संक्रमण हुने क्रम बढे त्यो निकै खतरापूर्ण हुने डब्ल्यूएचओको चिन्ता छ। एजेन्सी