काठमाडौं । नेकपा एमालेका वरिष्ठ नेता माधवकुमार नेपालले पूर्वमाओवादीहरु मिल्नुपर्नेमा जोड दिएका छन् । 

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपाका महासचिव नेत्रविक्रम चन्द ‘विप्लव’सँगको भेटवार्तामा उनले पूर्वमाओवादी मिल्नुपर्नेमा जोड दिएका हुन् ।

आजमात्रै नेता नेपालको कोटेश्वरस्थित निवासमा तीन नेताहरुबीच संयुक्त भेटवार्ता भएको थियो । 

नेपालनिकट एक नेताले भने,“उहाँले प्रचण्ड र विप्लवलाई मिल्न आग्रह गर्नुभयो । तपाईँहरु पनि मिल्नुस् हामी पनि मिल्छौँ भन्नुभयो । कम्युनिष्टहरुको एकतामा जोड दिनुभयो ।”

भेटवार्तामा सबै नेताहरुले कम्युनिष्ट एकताप्रति आफूहरु सकारात्मक रहेको बताएका थिए । 

सोही क्रममा सरकारले विप्लव नेतृत्वको पार्टीसँग वार्ताका क्रममा गरेको तीन बुँदे सहमतिबारेसमेत चर्चा भएको बताइएको छ ।

ओली नेतृत्वको सरकार ढलेपछि विप्लव राजनीतिक भेटवार्तामा सक्रिय छन् । बुधबार मात्रै विप्लव प्रचण्डलाई भेट्न खुमलटार पुगेका थिए ।