बीबीसी/अलजजिरा । अमेरिकी राष्ट्रपति जो बाइडनले अफगानिस्तानबाट आफ्ना सेनालाई फिर्ता गर्ने कदमको बचाउ गरेका छन् ।

सेना फिर्ती तालिबान सत्तामा आउने कारक बने पनि राष्ट्रपति बाइडनले उक्त कदमलाई ‘सबैभन्दा उत्तम निर्णय’ भन्दै बचाउ गरेका हुन् ।

तालिबान सत्तामा आए पनि राष्ट्रपति बाइडनले आफ्नो अफगानिस्तानमा २० वर्ष लामो अमेरिकी उपस्थिति अन्त्य भएको भोलिपल्ट राष्ट्रको नाममा सम्बोधन गर्दै राष्ट्रपति बाइडनले त्यहाँ बसिरहनुको अर्थ नभएको बताए । 

अचानक अमेरिकी फौज फिर्ता गर्ने निर्णयलाई लिएर बाइडनले देशभित्र र साझेदार राष्ट्रबाट व्यापक आलोचना खेप्नु परेको छ । उनले तालिबान शासन छल्न अफगानिस्तानबाट बाहिरिन चाहने १ लाख २० हजारभन्दा बढी मानिसहरूलाई हवाइ उद्धार गरेकोमा सेनाको प्रशंसा गरे । तालिबानले भने आफूहरूको जित भएको भन्दै खुसी मनाइरहेका छन् ।

सन् २००१ सेप्टेम्बर ११ मा अमेरिकामा भएको हमलाको जिम्मेवारी लिएको अलकायदाको आधार देश भएको भन्दै अमेरिकी नेतृत्त्वको गठबन्धन सेना अफगानिस्तान प्रवेश गरी तालिबान शासनलाई अन्त्य गरिदिएको थियो । 

मंगलबारको सम्बोधनमा बाइडनले अफगानिस्तानमा रहेका र अमेरिका जान चाहने करिब २०० मानिसहरूको उद्धार गर्न निरन्तर प्रयास गर्ने प्रतिबद्धता समेत जनाएका छन् ।