शवको पोष्टमार्टम नभएको भन्दै आफन्त आक्रोशित

अछाम । १४ दिन पछि मृत भेटिएका रेशम तिमल्सैनाको पोस्टमार्टम र अनुसन्धानमा ढिलाई भएको भन्दै आफन्त आक्रोशित भएका छन् ।

तिमल्सेनाको पोस्टमार्टम गर्न हिजो राति नै जिल्ला अस्पताल ल्याए पनि अहिले सम्म पोस्टमार्टम नभएको भन्दै आफन्त आक्रोशित भएका हुन् ।

कार्तिक २ गते गैरीटाडबाट बेपत्ता भएका तिमल्सेनाको शव कार्तिक १५ गते गैरीटाड बजार नजीकै बासको झाडीमा भेटिएको थियो ।

तिमिल्सेनाको शरीरमा डाम र टाउको चोट लागेका कारण हत्या नै भएको दाबी गर्दै आफन्तले तककाल अनुसन्धान प्रक्रिया सुरु गर्नु पर्ने माग पनि राखेका छन् ।

शव अस्पताल पुर्याएको १ दिन भइसक्दा पनि शवको पोष्टमार्टम नभएको भन्दै आफन्तले मंगलसेनमा सडक बन्द गरेका छन् । गाडी चल्न नदिने भन्दै सडक बन्द गरिएको आफन्तले बताएका छन् ।

उता कमलबजार विनायक र गैरीटाडमा पनि आफन्तले बन्द गरेका छन् ।

अछाममा पोस्टमार्टम गर्ने चिकित्सक पनि छैन

अछाम जिल्लामा पोस्टमार्टम गर्ने चिकित्सक नै नभएको खुलेको छ । जिल्ला अस्पताल अछामलाई शवको पोष्टमार्टम गर्ने अनुमति भए पनि चिकित्सक नभएको जानकारी खुलेको हो ।

जिल्लामा ५० बेड अनुमति प्राप्त अस्पताल सञ्चालनमा रहे पनि पोस्टमार्टम गर्ने चिकित्सक नभएको पाइएको हो ।

विशेषज्ञ चिकित्सक नभएको भन्दै प्रमुख जिल्ला अधिकारी रुद्र बहादुर मल्लले चिकित्सक पठाई दिन भनेर जिल्ला प्रशासन कार्यालय डोटी लाई पत्र लेखेका छन् ।

शवको पोस्टमार्टम र घट्नाको अनुसन्धानका विषयमा जानकारी लिन खोज्दा प्रमुख जिल्ला अधिकारी र प्रहरी प्रमुखको फोन सम्पर्क हुन सकेन् ।