“उपभोक्ता समिति दर्ता गर्ने देखी विद्यालय प्र.अ. र लेखापालको सेवासुविधा थप्ने सम्मका निर्णय पारित“

अछाम : जिल्लाको मंगलसेन नगरपालिकाको चालु आर्थिक वर्ष २०७८/०७९ को चौथो कार्यपालिका बैठक सम्पन्न भएको छ । नगरप्रमुख पदमबहादुर बोहराको अध्यक्षतामा भएको बैठकले चालु आर्थिक वर्षको प्रथम चौमासिक समिक्षा गरिनुका साथै विभिन्न निर्णय गरेको हो ।

बैठकमा नगरपालिकाको समग्रमा १६ प्रतिशत बजेट खर्च भएको विवरण सार्वजनिक गरिएको थियो भने प्रत्येक शाखागत रुपमा चौमासिक प्रगति विवरणबारे जानकारी सहित समिक्षा गरिएको थियो । यस्तै बैठकले मलेप को ५८ औं प्रतिवेदन कार्यान्वयन गर्ने र सो का लागि सम्पूर्ण उपभोक्ता समितिलाई विधानतः दर्ता गरेर मात्र चालु आर्थिक वर्षका योजना कार्यान्वयन गर्ने, चित्रेमा भएको बालुवा उपयोग गर्न वातावरणिय प्रभाव मुल्याँकन गरि सो क्षेत्रमा सडक विस्तार गर्ने निर्णय गरेको छ ।

यसैगरि कोभिड खोप अभियान सफल पार्न खोपलाई सेवा प्रवाह संग जोडेर सबैले सहयोग गर्ने, समपुरक र विशेष योजना छनोट गरि राष्ट्रिय योजना आयोगमा पठाउने, ४० जना बाढी पिडित र २ जना वस दुर्घटनामा मृतकका परिवारलाई जनही २५ हजारका दरले राहत उपलब्ध गराउने निर्णय भएको प्रमुख प्रशासकीय अधिकृत खकेन्द्र बहादुर सोडारीले बताए । उनका अनुसार कार्यपालिका बैठकले सहकारी संचालन सम्वन्धि २ वटा कार्यविधि, एक नियमावलि र एक नीति पारित गरिएको छ ।

कार्यपालिका बैठकले शैक्षीक क्षेत्रको सुधारका लागि विद्यालयका प्रधानाध्यापकहरुलाई थप जिम्मेवार बनाँउन जनही ५ सयका दरले थप भत्ता उपलब्ध गराँउने, विद्यालयका कर्मचारी लेखापाललाई जनही ३ हजारका दरले थप सेवा सुविधा उपलब्ध गराँउने तथा विद्यालयमा सट्टा शिक्षक राखेर अनुपस्थित हुने शिक्षकलाई आवश्यक कारवाही प्रक्रिया अगाडी बढाउँने निर्णय गरिएको छ ।

बैठकमा नगर उपप्रमुख सरिता उपाध्याय, सबै वडा अध्यक्षहरु, कार्यपालिका सदस्यहरु र शाखा प्रमुखहरुको सहभागिता रहेको नगरपालिकाका सूचना अधिकारी विष्णुप्रसाद जैशीले जानकारी दिए ।