अछाम : साइबर सुरक्षा सम्बन्धी एक दिने गोष्ठी जिल्लाको साँफेबगरमा सम्पन्न भएको छ ।

कम्प्युटर एशोसिएशन महासंघ नेपाल जिल्ला शाखा अछामको आयोजनामा साँफेबगर नगरपालिका वडा नं. २ मा रहेको त्रिपुरा सुन्दरी मावि श्रीकोटमा कार्यशाला गोष्ठी सम्पन्न भएको हो ।

सुरक्षित सुचना प्रविधि, सुशासन र समृद्धि भन्ने नारा दिईएको राष्टिय सुचना तथा सञ्चार प्रविधि दिवस २०८० को अवसर पारेर साईबर सुरक्षा सम्बन्धी प्रशिक्षण तथा यसका बारेमा जनचेतना फैलाउन कार्यशाला गोष्ठी गरिएको हो ।

कार्यशाला गोष्ठीमा बिद्यालयका शिक्षक तथा बिद्यार्थीहरुलाई साईबर सुरक्षा र यसका खतराका बारेमा क्यान महासंघ जिल्ला शाखा अछामका कार्यबाहक अध्यक्ष दिनेश कुमार स्वाँर र सहसचिव हिमाल बुढाले जानकारी गराएका थिए ।

फितलो साईबर प्रणालीमा साईबर आक्रमण बढी हुने भएकाले यसबाट कसरी सुरक्षित हुने र यसका बारेमा बिद्यालय तह देखि गाँउघरमा समेत कसरी सुरक्षित रहने भन्ने बिषयमा जनचेतना फैलाउन कार्यशाला गोष्ठीको आयोजना गरिएको क्यान अछामले जनाएको छ ।

क्यान महासंघ जिल्ला शाखा अछामका कार्यबाहक अध्यक्ष दिनेश कुमार स्वाँरको अध्यक्षतामा भएको गोष्ठीमा बिद्यालयका निमित्त प्रधानाध्यापक टेक बहादुर कुवँर लगायत कक्षा ६ देखि १२ सम्मका बिद्यार्थीहरुको सहभागीता रहेको थियो भने गोष्ठीको सञ्चालन क्यान महासंघ अछामका सहसचिव हिमाल बुढाले गरेका थिए ।