अछामको तुर्माखाद गाउँपालिकामा उपाध्यक्ष किशोरी सचेतना कार्यक्रम सम्पन्न भएको छ । किशोरीहरुका सवाल उनीहरुकै आवाज बाट सुन्ने र किशोरीहरुको नेतृत्व, व्यक्तित्व विकास गर्ने उदेश्यले उपाध्यक्ष किशोरी कार्यक्रमको आयोजना गरिएको गाउँपालिका उपाध्यक्ष बीमला शाहीले बताउनुभयो ।

आजका किशोरीहरु समक्ष भए मात्रै भोलि समाज सुन्दर हुने भएकाले आगामी दिनमा आफ्नो पालिका भरी रहेका किशोरिहरुलाई यो कार्यक्रममा सहभागि गराई सकृय पार्ने आफ्नो लक्ष्य रहेको उपाध्यक्ष शाहीको भनाई छ । यति मात्रै होईन किशोरि तथा सुनौला हजार दिनका आमाहरुका लागि थप रचनात्मक कार्यहरु समेत अगाडी बढाउने सोही कार्यक्रममा प्रतिबद्धता जनाउनु भएको थियो ।

पालिका भरिका १२ वटा माध्यामिक विद्यालय बाट ११ वटा माध्यामिक विद्यालयका ५५ जना किशोरीहरुको सोमबार पालिकामा भएको उपाध्यक्ष किशोरी सचेतना कार्यक्रममा सहभागिता रहेको थियो । कार्यक्रममा सहभागि किशोरीहरुले आफुले घर परिवार समाजमा भोगी रहेका समस्याका बारेमा गुनासो राखेका थिए ।

सोही कार्यक्रबाट बीमला बुढाको अध्यक्षतामा ११ जनाको किशोरी समुह समेत गठन गरिएको छ । किशोरी समुहको उपाध्यक्षमा रमिता चलाउने, सचिव गायत्री न्यौपाने, सहसचिव झरना बयक, कोषाध्यक्ष उर्मिला बुढा लगायतका ११ जनाको समुह गठन गरिएको हो ।

यो समुहले पालिका संग समन्वय गरेर किशोरीहरुका सवालका बारेमा सरोकारवाला संग अन्र्तक्रिया र छलफल गर्ने महिला बालबालिका तथा जेष्ठ नागरिक शाखा प्रमुख जनक थापाले जानकारी दिनुभएको छ ।