अछाम —तिलगंगा आँखा प्रतिष्ठान काठमाडौंले सुदूरपश्चिमको ८८ स्थानीय तहमध्ये अछामको कमलबजार नगरपालिकामा पहिलो पटक आफ्नो लगानीमा सेवा दिने भएको छ ।

तिलगंगा आँखा प्रतिष्ठानका नेपाल आँखा कार्यक्रमका डाक्टर मोहन कृष्ण श्रेष्ठका अनुसार शहरी आँखा केन्द्र कमलबजार अछामको संचालनका लागि तिलगंगा आँखा प्रतिष्ठान, कमलबजार नगरपालिका र नेपाल नेत्रज्योति संघ गेटा आँखा अस्पतालबीच सम्झौता भएको छ । ‘अन्य संस्थाहरु सहकार्य गरेर सुदूरपश्चिममा शिविर संचालन भइरहेका छन् ।

संस्थागत रुपमा सुदूरपश्चिममा पहिलो पटक तिलगंगा आँखा प्रतिष्ठानले कमलबजार नगरपालिकासँग सहकार्य गरेर काम गर्न थालेको हो । अछाममा संचालन हुने आँखा उपचार केन्द्रको फ्रन्टलाइनमा तिलगंगा आँखा प्रतिष्ठान नै रहने छ,’ डाक्टर श्रेष्ठले भने, ‘तिलगंगा आँखा प्रतिष्ठानले यसअघि ४५ स्थानीय तहसँग सहकार्य गरेर काम गरिरहेको छ । यी मध्येका धेरैजसो स्थानीय तह बाग्मती प्रदेशका छन् । सुदूरपश्चिममा पहिलो पटक सेवा दिँदैछौं ।’

सबै जनताको पहुँचमा गुणस्तरीय आँखा स्वास्थ्य सेवा प्रदान गर्न, आँखा उपचार सेवाको पहुँच नपुगेका ठाउँहरुमा शिविर संचालन गर्न र दुर्गमका जनतालाई आँखा उपचारमा राहत दिनका लागि तिलगंगा आँखा प्रतिष्ठान र गेटा आखा अस्पतालसँग सहकार्य गरेर सेवा प्रवाहको प्रयास भइरहेको कमलबजार नगरपालिकाका प्रमुख यज्ञप्रसाद ढकालले बताए ।

उनका अनुसार तिलगंगा आँखा प्रतिष्ठानले ४० लाख रुपैयाँ बराबरको लगानी लगाउने, २ जना कर्मचारीको तलब बेहोर्ने, वर्षमा एक पटक विशेषज्ञ आँखा शिविर संचालन गर्ने सम्झौतामा उल्लेख छ । नगरपालिकाको चालु आर्थिक वर्षको बजेटमा कमलबजारमा शहरी आँखा केन्द्र संचालनका लागि १० लाख बजेट विनियोजन गरिएको छ ।

‘दुर्गमका जनताले आँखाको राम्रो उपचार पाएका छैनन् । धनगढी , नेपालगञ्ज, काठमाडौंसम्म उपचारका लागि पुग्न नसक्ने जनता धेरै छन् । उनीहरुलाई केन्द्रमा राखेर पहिलो पटक यो कार्यक्रम सुदूरपश्चिमको कमलबजारमा लागु हुँदैछ,’ नगर प्रमुख ढकालले भने,‘कमलबजार मात्रै नभएर तुर्माखाँद, ढकारी र दैलेखसम्मका जनताले सेवा पाउने छन् ।’

शहरी आँखा केन्द्र संचालनका लागि कमलबजार नगरपालिकाका स्थानीय चित्र बजगाइले निशुल्क भवन उपलब्ध गराउने भएका छन् । स्थानीयले आफ्नै ठाउँमा आखाको उपचार पाउने भएपछि त्यसलाई सहज बनाउन अर्को व्यवस्था नहुञ्जेलसम्मका लागि आफ्नो घर निशुल्क रुपमा उपलब्ध गराउने उनले बताए ।

‘आँखामा सानो समस्या हुँदा पनि शहरबजार नै जानुपर्ने बाध्यता हट्ने भएपछि मैले पनि निशुल्क रुपमा भवन दिने निर्णय गरेँ,’ उनले भने ।