अछाम : जिल्लाको विकट पूर्वी क्षेत्रमा रहेको तुर्माखाद गाउँपालिकाका विभिन्न वडाहरूमा विद्युतको राष्ट्रिय प्रसारण लाइन विस्तार गर्ने काम भइरहेको छ । जस अन्तर्गत वडा नं ३ भैरवस्थानमा राष्ट्रिय प्रसारण लाइन बाट बिद्युत प्रसारण भएसँगै मङ्गलबार एक कार्यक्रमका बीच उद्घाटन गरिएको हाे ।

वडा नम्बर ३ का वडा अध्यक्ष काँसीराम बुढाको अध्यक्षतामा भएको उद्घाटन कार्यक्रममा गाउँपालिका अध्यक्ष डम्बर बहादुर बिसी प्रमुख अतिथि रहेका थिए । तुर्माखाँद भित्रका दुरदराज गाउँ हरू उज्यालो बनाउन आफू लागिपरेकाे उनको भनाइ छ ।

उद्घाटन कार्यक्रममा विद्युत प्राधिकरण अछामका कार्यालय प्रमुख हिक्मत बहादुर बुढाले तुर्माखातको भैरवस्थानसम्म राष्ट्रिय प्रसारण लाइन पुर्‍याउनका लागि करिब ९१ लाखभन्दा बढी खर्च भइसकेको बताए । मट्टीतेल र चाेइलाकाे सहाराले उज्यालो बाल्दै आफ्नो विगतको तिताे इतिहास स्मरण गर्दै उनले अहलेकाे पुस्ता भाग्यमानी भएको उल्लेख गरे । तुर्माखाँदका स्थानीय समेत रहेका बुढा कार्यालय प्रमुख भएर आफ्नै गाउँमा प्रसारण लाइनको विद्युत प्रवाह उद्घाटन गर्न पुग्दा उनले खुसी व्यक्त गरेका छन् ।

तुर्माखादमा राष्ट्रिय प्रसारण लाइन विस्तारसँगै विद्युत प्रवाह हुन थालेपछि स्थानीयहरू खुसी भएका छन्।