अछाम ः अछाम जिल्लामा स्वास्थ्य बिमामा आवद्ध हुनेको संख्या ५९ हजार नाघेको छ । यो समाचार तयार पार्दासम्म बिमित हुनेको संख्या ५९ हजार ३१ रहेको स्वास्थ्य बिमा बोर्ड अछामले जनाएको छ ।

स्वास्थ्य बिमामा आवद्ध हुनेमा सबैभन्दा बढी साँफेबगर नगरपालिकाका रहेका छन् भने कम चौरपाटी गाँउपालिकामा रहेको छ । साँफेबगरमा बिमितको संख्या ११ हजार ५४ छ भने चौरपाटीमा बिमितको संख्या २ हजार ७ सय २१ रहेको छ ।

मंगलसेन नगरपालिकामा ८ हजार २१, तुर्माखाँद गाँउपालिकामा ८ हजार ४ सय ३१, कमलबजार नगरपालिकामा ६ हजार ५ सय १२, पञ्चदेवल बिनायक नगरपालिकामा ५ हजार ६ सय १४ जना स्वास्थ्य बिमामा आवद्ध भएका छन् ।

यस्तै रामारोशन गाँउपालिकामा ४ हजार ६ सय ९८, ढकारी गाँउपालिकामा ४ हजार ६ सय २१, मेल्लेख गाँउपालिकामा ३ हजार ५ सय ९० र बान्नीगढी जयगढ गाँउपालिकामा ३ हजार ३ सय १९ जना स्वास्थ्य बिमामा बिमित रहेका छन् ।

पालिकाहरुको जनसंख्याको आधारमा भने यो संख्या कम हो । स्थानिय तहका जनप्रतिनिधि र कर्मचारीहरुले आफ्नो पालिकाबासीलाई स्वास्थ्य बिमामा आवद्ध गराउन थप पहल गर्नुपर्ने देखिन्छ ।

स्वास्थ्य बिमामा आवद्ध भएमा ३ हजार ५ सय रुपयाँ प्रिमियमले एक घरपरिवारको ५ जना सदस्यले १ लाख सम्मका उपचार शुल्क पाउन सकिन्छ भने ५ जना भन्दा बढी परिवार सदस्यका लागि ७ सय थप शुल्क लाग्ने गरेको स्वास्थ्य बिमा बोर्ड मंगलसेनका कर्मचारी तारामान केसीले बताए ।