अछाम : स्वास्थ्यका लागि खेलकुद, राष्टका लागि खेलकुद नारा दिईएको १५ औँ जिल्ला स्तरिय राष्टपति रनिगं शिल्ड प्रतियोगिता चौरपाटी गाँउपालिकामा हुने भएको छ । फागुन ७ गते सुरु हुने प्रतियोगिताको सम्पूर्ण तयारी अन्तिम चरणमा पुगेको गाँउपालिकाका अध्यक्ष भिम बहादुर साँउदले बताए ।

प्रतियोगिताको लागि खेलमैदान लगायतका आवश्यक पूर्वाधारको तयारी पुरा भएको अध्यक्ष साँउदले बताए । फागुन ७ गते प्रजातन्त्र दिवसको दिन सुदूरपश्चिम प्रदेश सरकारका सामाजिक विकास मन्त्री माननिय मेघराज खड्काले प्रतियोगिताको उद्घाटन गर्ने कार्यक्रम तय भएको अध्यक्ष साँउदले बताए ।

प्रतियोगिताका लागि पूर्वाधार सहितको अन्य व्यावसथापनमा पालिकाले २४ लाख रुपयाँ बजेट बिनियोजित गरेको गाँउपालिकाका निमित्त प्रमुख प्रशासकीय अधिकृत धन बहादुर थापाले बताए । बाकी रकम जिल्ला खेलकुद समितिको गरेर कुल बजेट ३० लाख रहेको अधिकृत थापाले बताए ।

उद्घाटनको दिन ७ गते चौरपाटी गाँउपालिकाका ७ वटै वडाका स्थानिय कला तथा संस्कृती झल्किने झाँकीहरु प्रदर्शन गरिने तयारी छ । साथै प्रतियोगितामा कलाकार जनक साँउद (अछामी माग्ने बुढा) भीम बिष्ट (अछामी रेखा) टेक बहादुर बोगटीले समेत आफ्नो कला प्रस्तुत गर्ने छन् भने देउडा खेलका लागि कलाकार चित्रा शाहीलाई समेत आमन्त्रण गरिएको जिल्ला खेदकुद समिति अध्यक्ष केशर खड्काले बताए ।

जिल्ला खेलकुद समिति अछामको आयोजनामा हुने १५ औँ जिल्ला स्तरिय राष्टपति रनिगं शिल्ड प्रतियोगितामा चौरपाटी गाँउपालिका सहआयोजक रहेको छ । यसअघि १४ औँ राष्टपति रनिंग सिल्ड प्रतियोगिता सदरमुकाम रहेको मंगलसेन नगरपालिकामा आयोजना भएको थियो ।

१० वटै पालिकाबाट करिब ७ सय खेलाडी सहभागी हुने ।

प्रतियोगिताका लागि अछामका १० वटै पालिकाबाट करिब ७ सय खेलाडी सहभागी हुने जिल्ला खेलकुद समिति अछामका कार्यालय प्रमुख हर्क साँउदले बताए । बिभिन्न बिधाका गरि ७ सय खेलाडी सहित खेल प्रशिक्षक, व्यावस्थापक, पालिकाका जनप्रतिनिधी र कर्मचारी समेत प्रतियोगितामा सहभागि हुने कार्यालय प्रमुख साँउदले बताए ।

फागुन ७ देखि ११ गते सम्म सञ्चालन हुने खेलमा सहभागी खेलाडी लगायत अन्य महानुभावहरुका लागि खान बस्नको प्रबन्ध समेत पालिकाका बिभिन्न होटलमा व्यावस्थापन गरिएको छ भने आवासका लागि पालिकाले लुगाकपडा खरिद गरेर अस्थायी रुपमा चौरपाटीमा रहेका होटल सहित कार्यालयका कोठाहरु समे प्रयोगमा ल्याईने आयोजकले जनाएको छ ।

यसपटक प्रतियोगितामा महिला पुरुष भलिबल, महिला पुरुष कबड्डी, कराते, एथ्लेटिक्स तर्फ हाईजंप, लम्जम्प, सटफुट, ज्याब्लिगं थ्रो, दौड तर्फ १०० मिटर, २०० मिटर, ४०० मिटर, ८०० मिटर, १५०० मिटर र ३ हजार मिटर लगायतका खेल समाबेश रहेका छन् ।