अछाम – नेपाली काङ्ग्रेसका निवर्तमान सहमहामन्त्री एवं पूर्व मन्त्री Badri Prasad Pandey ले देशलाई वर्तमान संकटबाट मुक्त गर्न नेपाली काङ्ग्रेसलाई निर्वाचनमा विजयी गराउन आवश्यक रहेको बताएका छन्।

नेपाली काङ्ग्रेस ढकारी गाउँपालिकाद्वारा आयोजित विशाल चुनावी आमसभालाई सम्बोधन गर्दै उनले संसदमा नेपाली काङ्ग्रेस ठूलो संख्यामा पुगे मात्र मुलुकले राजनीतिक निकास पाउने दाबी गरे।

उनका अनुसार पछिल्लो समय उठिरहेको ‘जेन्जी आन्दोलन’ले भ्रष्टाचारमुक्त शासन व्यवस्था र आम नागरिकलाई सुशासनको प्रत्याभूति माग गरेको उल्लेख गर्दै त्यसलाई कार्यान्वयन गर्ने सामर्थ्य नेपाली काङ्ग्रेससँग मात्र रहेको बताए।

पाण्डेले संविधान जारी प्रक्रियाको सन्दर्भ उठाउँदै धेरैपटक कम्युनिस्ट नेतृत्वमा सरकार बने पनि संविधान जारी हुन नसकेको स्मरण गरे। अन्ततः नेपाली काङ्ग्रेसकै नेतृत्वमा संविधान जारी भएर देशले निकास पाएको उनको भनाइ थियो।

उनले देशको स्थायित्व र निकासका लागि कांग्रेसले विगतमा राणा शासनदेखि राजासम्म सबै पक्षसँग सहकार्य गर्दै अगाडि बढ्ने क्षमता देखाएको उल्लेख गरे।

अछाम क्षेत्र नम्बर २ बाट प्रतिनिधि सभा सदस्यका उम्मेदवार Pushpa Bahadur Shah सँग जिल्लाको विकासका लागि स्पष्ट मार्गचित्र रहेको दाबी गर्दै उनलाई अत्यधिक मतका साथ विजयी गराउन आग्रह गरे।

कार्यक्रममा पूर्व सांसद रामबहादुर बिष्ट, अक्कल बिष्ट, प्रदेश सभा सदस्य मानबहादुर रावल, पूर्व प्रदेश सभा सदस्य अम्बि थापा लगायत नेता–कार्यकर्ताको उपस्थिति रहेको थियो।

त्यसैगरी प्रतिनिधि सभा सदस्य उम्मेदवार पुष्पबहादुर शाह, नेपाली काङ्ग्रेस सुदूरपश्चिम प्रदेश सहमहामन्त्री अम्बिका चलाउने, जिल्ला सचिव प्रकाश साउद, समानुपातिक उम्मेदवार टेकबहादुर बिक लगायतले पनि मन्तव्य राखेका थिए। गाउँपालिका सभापति धनबहादुर बुढाको सभापतित्वमा सम्पन्न कार्यक्रममा स्वागत मन्तव्य नेत्रकला शाहीले राखेकी थिइन् भने सञ्चालन टंक साउदले गरेका थिए।

कार्यक्रमका क्रममा नेकपा एमाले र नेकपा परित्याग गरी दर्जनौँ व्यक्तिहरू नेपाली काङ्ग्रेसमा प्रवेश गरेको जनाइएको छ।