“दारी ग्याङ अछाम स्थापनाको १ बर्ष“

अछाम । जिल्लामा दारी ग्याङ स्थापना भएको १ बर्ष पुरा भएको छ । समाज रुपान्तरणका लागि जनचेतना मुलक, सामाजिक तथा परोपकारी कार्य गर्ने उद्देश्यले स्थापना भएको दारी ग्याङको आज १ बर्ष पुरा भएको हो ।

सामाजिक क्षेत्रमा काम गर्दै आइरहेको गैरराजनीतिक तथा सामाजिक संस्था दारी ग्याङ गत बर्ष आजकै दिन अछाममा पनि बिस्तार भएको थियो । समाजका परिर्वतनशिल युवाहरुलाई समेटेर स्थापना भएको १ बर्षको अवधिमा दारी ग्याङ अछामले विभिन्न सामाजिक कार्य गर्दै आईरहेको छ ।

मुख्यतया रक्तदानलाई बढी जोड दिएको समुहले सरसफाई कार्यक्रम, असाह्यलाई सहयोग लगायतका सामाजिक तथा परोपकारी काम गर्दै आईरहेको छ । दारी ग्याङ अछामले जिल्लामा ब्लड बैँक स्थापना नहुदाँ बिद्यमान समस्याका रुपमा रहेको रगत अभावलाई पूर्ती गर्ने कामलाई बढी जोड दिएको छ । जिल्लमा रगत अभावमा अस्पतालको शैयामा छट्पटाईरहेका बिरामीहरुलाई रगत उपलब्ध गराउने काम दारी ग्याङ अछामले गर्दै आईरहेको छ ।

जिल्लामा नेपाल रेडक्रस सोसाईटीले ब्लड बैँक तथा रक्तदानका लागि मुख्य जिम्मेवारका साथ पहल गर्नुपर्ने भएपनि त्यसो हुन नसक्दा रगत अभाव जिल्लामा सधैँ भईरहेको छ । कहिले आर्मी, पुलिस तथा कहिले अन्य सहयोगीलाई गुहार गरेर बिरामीले रगत माग्नु पर्ने अवस्थालाई दारी ग्याङले केही हद्सम्म कम गरेको छ ।

अस्पतालमा कुनै पनि बिरामीलाई रगत चाहिएमा हामीले सम्झिने भनेकै दारी ग्याङलाई हो स्वास्थ्यकर्मी छत्र साँउदले भने उहाँहरुको एकदमै छिटो रेस्पोन्सले बिरामीको ज्यान बचाउन मद्धत पुगेको छ । दारी ग्याङले पहल नगरेको भए रगत अभावमा कतिपयले अकालमै ज्यान गुमाउनुपर्ने अवस्था सृजना हुने उनको भनाई छ । ब्लडका लागि अन्य कुनैपनि संघसंस्थाले जिल्लामा खास्सै पहल नर्गदा समस्या भएको साँउदको भनाई छ ।

जिल्लाका अस्पतालहरुमा भर्ना भएका बिरामी कसैलाई पनि रगत आवश्यक परे आजभोली पहिलो सम्झीने नाम भनेको दारी ग्याङ भएको छ । कसैलाई रगत आवश्यक परे मलाई तुरुन्त फोन आउछ दारी ग्याङ अछामका संयोजक उमेश कुवँरले सुदूरआजसंग भने म साथिहरुसंग समन्वय गरेर त्यसको तत्काल परिपुर्ती गर्न तर्फ लाग्छु । जिल्लाका बयालपाटा र जिल्ला अस्पतालमा बिरामीलाई रगत आवश्यक परे आफुहरुलाई फोन आउने र त्यहि आधारमा समहुमा र सामाजिक सञ्जालमा पोष्ट गरेर रगत अभावलाई कम गराएका छौँ ।

संयोजक कुवँर भन्छन् जिल्लामा ब्लड बैँकको स्थापना हुनुपर्ने र त्यसका लागि नेपाल रेडक्रस सोसाईटीले पहल गर्नुपर्छ । ब्लड बैँकको स्थापना गर्नुपर्ने रेडक्रस अहिले मास्क बाढिरहेको छ कुवँरले भने मास्क त जहाँ त्यही सजिलै पाईन्छ ब्लड बैँक स्थापना गर्न तर्फ लागौँ । ब्लड बैँक स्थापना गर्न जिल्लाका राजनितिक दल, समाजसेवी, संघसंसस्था लाग्नुपर्ने र त्यसमा दारी ग्याङ अछामले पनि साथ दिने संयोजक कुवँरको भनाई छ ।

स्थापना भएको केही दिनमा गत बर्ष आत्मदाह गरेका सिद्धार्थ आउजीका परिवारलाई आर्थिक सहयोग गरेर अभियान सुरुवात गरेको दारी ग्याङ अछामले त्यसपछिका दिनमा बजार सरसफाई लगायतका सामाजिक कार्य पनि गर्दै आईरहेको छ । ४ बर्ष अघि सामाजिक संजालबाट सुरु भएको दारी ग्याङ नेपालका ३१ भन्दा बढि जिल्लाहरुमा बिस्तार भएको छ ।

आगामी दिनमा दारी ग्याङ अछामले रक्तदानको नियमितता संगै जिल्लाका पर्यटकीय स्थलको संरक्षण र प्रचार प्रसार गर्ने, सचेतना प्रदान गर्ने, प्राकृतिक विपतमा परेकालाई भौतिक, आर्थिक सहयोग गर्दै जाने र समान उद्देश्य बोकेका संस्थाहरुसंग सहकार्य गर्ने समूहका संयोजक कुवँरले बताए । उनका अनुसार समाजका विकृतिका विरुद्ध अभियान चलाउने लक्ष्य समेत दारी ग्याङको रहेको छ । दारी ग्याङ धनगढीका संयोजक दिनेश बोहराको पहलमा अछाम शाखा बिस्तार भएको थियो ।

दारी ग्याङ अछामको समुह ।

संयोजक : उमेश राणा कुवँर
सहसंयोजक : धिरज कुवँर
सचिव : नमराज भण्डारी
कोषाध्यक्ष : सुशिल भण्डारी
सहसचिव : दिनेश कुवँर
मिडिया संयोजक : पूर्ण खड्का
प्रविधि संयोजक : रमेश महर
सल्लाहकार : खेमराज ढुंगाना, अमित खड्का लगायतका अन्य सदस्य रहेका छन् ।