गजल १
निम्तो बिना ढलक्कै ढल्केर बूँद आयो
हो यो पुरानु बानी पल्केर बूँद आयो !

के–को वसन्त कस्तो बर्खा कुरेर बस्नू
प्यासी तमाम सम्झी छल्केर बूँद आयो !

पानी खन्याई आगो मार्छौ कमाल के भो ?
सक्छौ भने निभाऊ सल्केर बूँद आयो !

प्यूनु पिएर आँसु सम्झेर रात रुन्चे
एकाबिहानै शीतमा झल्केर बूँद आयो !

मुर्छा खटाउँदै थें बेजान बालुवामा
माटो गलक्क गल्क्यो हल्केर बूँद आयो !

जल्ले निचोरी फाल्ने कसरत गरे मजाले
तिन्कै निधारमाथि टल्केर बूँद आयो ! 

गजल २
फरक छन् नजरको कुरा के गरूँ खै
म गाला अधरको कुरा के गरूँ खै

कलेंटी परेको छ सुन्दै छु लाली !
नमीठो खबरको कुरा के गरूँ खै

दिँदैदिन्न केही दिए चोट दिन्छ
निठुरी सहरको कुरा के गरूँ खै

बदर नै सदर छ सदर नै बदर छ
सदरको बदरको कुरा के गरू खै

जहाँ बूँद टिक्ने कुनै ठाउँ छैन
बिरानो सगरको कुरा के गरूँ खै ।